കണ്ണൂർ: മൈസൂർ ദസറ കഴിഞ്ഞാൽ ഏറെ പ്രശസ്തമായ കണ്ണൂർ ദസറയ്ക്ക് വിപുലമായ ഒരുക്കങ്ങളോടെ തുടക്കമാകുന്നു. കണ്ണൂർ കോർപ്പറേഷന്റെ പുതിയ ഭരണസമിതി അധികാരമേറ്റതിനുശേഷമുള്ള ആദ്യ ദസറ ആഘോഷമാണിത്. ഒക്ടോബർ 12 മുതൽ 21 വരെ കണ്ണൂർ കലക്ട്രേറ്റ് മൈതാനിയിലാണ് ദസറ ആഘോഷങ്ങൾ നടക്കുന്നത്. ‘ഒരുമക്കായി ദസറ ലഹരിക്കെതിരെ തൂഫാൻ’ എന്നതാണ് ഈ വർഷത്തെ ദസറയുടെ മുദ്രാവാക്യം.
കണ്ണൂർ ദസറ സംഘാടക സമിതിയുടെ നേതൃത്വത്തിൽ നടന്ന പത്രസമ്മേളനത്തിലാണ് ആഘോഷപരിപാടികളുടെ വിശദാംശങ്ങൾ പുറത്തുവിട്ടത്. ഒക്ടോബർ 12-ന് കേരളത്തിന്റെ ആഭ്യന്തര വകുപ്പ് മന്ത്രി കണ്ണൂർ ദസറയുടെ ഉദ്ഘാടനം നിർവഹിക്കും.
പ്രധാന ആകർഷണങ്ങൾ:
മെഗാ ഡ്രോൺ ഷോ: ദസറയുടെ സമാപന ദിവസമായ ഒക്ടോബർ 21-ന് കലക്ട്രേറ്റ് മൈതാനിയിലെ മെഗാ ഇവന്റിന് ശേഷം കണ്ണൂർ ജവഹർ സ്റ്റേഡിയത്തിൽ കേരളത്തിൽ ആദ്യമായി ഇത്രയും വിപുലമായ മെഗാ ഡ്രോൺ ഷോ അരങ്ങേറും.
ഡബിൾ ഡെക്കർ ബസ്: കണ്ണൂരിലെത്തുന്നവർക്ക് നഗരം ചുറ്റിസഞ്ചരിക്കാൻ കെ.എസ്.ആർ.ടി.സി.യുടെ സഹകരണത്തോടെ ഡബിൾ ഡെക്കർ ബസ് ഒരുക്കിയിട്ടുണ്ട്.
ലഹരിവിരുദ്ധ പ്രചാരണങ്ങൾ: ‘ഓപ്പറേഷൻ തൂഫാൻ’ സന്ദേശം പ്രചരിപ്പിക്കുന്നതിന്റെ ഭാഗമായി വ്ലോഗേഴ്സ് മീറ്റ്, ചിത്രരചന മത്സരം, മെഹന്തി ഫെസ്റ്റ്, സൗഹൃദ ഫുട്ബോൾ മത്സരം, വിളംബര ജാഥ, മെഗാ ശുചീകരണം തുടങ്ങിയ വിവിധ പരിപാടികൾ ഇതിനോടകം സംഘടിപ്പിച്ചു കഴിഞ്ഞു.
ദീപാലങ്കാര മത്സരങ്ങൾ: കോർപ്പറേഷൻ പരിധിയിലെ വ്യാപാര സ്ഥാപനങ്ങളും പൊതുസ്ഥലങ്ങളും ദീപാലങ്കാരങ്ങളാൽ സുന്ദരമാക്കും. മികച്ച ദീപാലങ്കാരങ്ങൾക്ക് സോണൽ, കോർപ്പറേഷൻ അടിസ്ഥാനത്തിൽ സമ്മാനങ്ങൾ നൽകും.
കലാപരിപാടികൾ:
കെ. ഹരിശങ്കറിന്റെ ഗാനമേള, ഫെജോ റാപ്പ് ഷോ, തൃസന്ധ്യ ബാൻഡിന്റെ മ്യൂസിക് ഫ്യൂഷൻ, ബിൻസിയും ഇമാമും അവതരിപ്പിക്കുന്ന ഗസൽ, നവ്യാനായരുടെ ഭരതനാട്യ കച്ചേരി, മസാല കോഫി ബാൻഡിന്റെ ഗാനമേള, വെല്ലിംഗ്ടൺ ഐലൻഡ് മ്യൂസിക് ബാൻഡ്, ആസിഫ് കാപ്പാടിന്റെ ഇശൽ നൈറ്റ്, ഗംഗ ശശിധരന്റെ വയലിൻ ഫ്യൂഷൻ, അഥീന ഫോക്ക് മെഗാഷോ, ത്രയമ്പകത്തിന്റെ ഭജൻസ് തുടങ്ങിയ വിവിധ കലാപരിപാടികൾ പത്തു ദിവസങ്ങളിലായി അരങ്ങേറും. കൂടാതെ കോർപ്പറേഷനിലെ 240-ഓളം പ്രാദേശിക കലാകാരന്മാരുടെ 74 പരിപാടികളും ദസറയുടെ ഭാഗമായി നടക്കും.
പത്രസമ്മേളനത്തിൽ മേയർ അഡ്വ. പി. ഇന്ദിര, ഡെപ്യൂട്ടി മേയർ കെ.പി. താഹിർ, സ്റ്റാൻഡിങ് കമ്മിറ്റി ചെയർമാന്മാർ, ദസറ കോർഡിനേറ്റർ കെ.സി. രാജൻ മാസ്റ്റർ, മീഡിയ കമ്മിറ്റി ചെയർമാൻ സി. സുനിൽ കുമാർ തുടങ്ങിയവർ പങ്കെടുത്ത് സംസാരിച്ചു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.