ഹൂതിആക്രമണ ഭീതി : കണ്ണൂർ – റിയാദ് വിമാനം റിയാദിൽ ഇറങ്ങാതെ കണ്ണൂരിൽ തിരിച്ചിറക്കി

മട്ടന്നൂർ: കണ്ണൂർ വിമാനത്താവളത്തിൽ നിന്ന് റിയാദിലേക്ക് പുറപ്പെട്ട വിമാനം റിയാദിൽ ലാൻഡിങ്ങ് നടത്താതെ തിരികെയെത്തി. റിയാദ് വിമാനത്താവളത്തിന് ഹൂതികളുടെ ആക്രമണ ഭീഷണി ഉള്ളതിനാലാണ് വിമാനം റിയാദിൽ ഇറങ്ങാതെ തിരികെപ്പറന്നത്. കണ്ണൂരിൽ നിന്ന് വ്യാഴാഴ്ച ഉച്ചയ്ക്ക് 2.10 ന് യാത്ര തിരിച്ച എയർ ഇന്ത്യ എക്സ്പ്രസ് ഐ. എക്സ് 789 വിമാനം 4.30 നാണ് റിയാദിൽ എത്തേണ്ടിയിരുന്നത്. എന്നാൽ സുര രക്ഷാ ഭീഷണി കണക്കിലെടുത്ത് ലാൻഡ് ചെയ്യാതെ തിരിച്ചു വരികയായിരുന്നു. രാത്രി എട്ടോടെയാണ് വിമാനം തിരികെ കണ്ണൂർ വിമാനത്താവളത്തിൽ എത്തിയത്. സുരക്ഷാ പ്രശ്നം കണക്കിലെടുത്താണ് വിമാനം തിരികെ വന്നതെന്നും യാത്രക്കാർക്ക് ആവശ്യമായ ക്രമീകരണങ്ങൾ ഒരുക്കുമെന്നും എയർലൈൻ അധികൃതർ അറിയിച്ചു.

അതേസമയം റിയാദ് വിമാനത്താവളത്തിന് നേരെ ഹൂതികളുടെ മിസൈൽ ആക്രമണം റിപ്പോർട്ട് ചെയ്തതിന് പിന്നാലെ ഇന്ത്യയിൽ നിന്ന് സൗദി അറേബ്യയിലേക്കുള്ള വിമാനസർവീസുകൾ റദ്ദാക്കി ഇൻഡിഗോ, എയർ ഇന്ത്യ, എയർ ഇന്ത്യ എക്‌സ്പ്രസ് എന്നീ വിമാന കമ്പനികൾ.

ഒക്ടോബർ 10 വരെയും തിരികെയുമുള്ള എല്ലാ സർവീസുകളും റദ്ദാക്കിയിട്ടുണ്ട്. ടിക്കറ്റ് ബുക്ക് ചെയ്തവർക്ക് മുഴുവൻ പണമോ സൗജന്യമായി റീഷെഡ്യൂൾ യാത്രയോ നൽകുമെന്ന് വ്യോമയാനകമ്പനികൾ അറിയിച്ചു. സുരക്ഷാ ഭീഷണിയുടെയും പശ്ചാത്തലത്തിലാണ് നടപടി. നേരത്തെ ഡൽഹിയിൽ നിന്ന് റിയാദിലേക്ക് പുറപ്പെട്ട രണ്ട് വിമാനങ്ങൾ തിരിച്ചിറക്കിയിരുന്നു. 

സൗദിയിലെ റിയാദ് വിമാനത്താവളത്തിന് നേരെ ഹൂതികളുടെ മിസൈൽ ആക്രമണമുണ്ടായ പശ്ചാത്തലത്തിലാണ് വിമാന സർവീസുകൾ റദ്ദാക്കിയത്. ആക്രമണത്തിൽ വിമാനത്താവളത്തിൽ നിന്ന് നിർത്തിയിട്ടിരുന്ന വിമാനത്തിൽ നിന്ന് പുക ഉയർന്നതായി വാർത്താഏജൻസികൾ റിപ്പോർട്ട് ചെയ്തിരുന്നു.

വിമാനത്താവളത്തിലേക്ക് പുറപ്പെടുന്നതിന് മുൻപായി അതത് വിമാനക്കമ്പനികളുമായി നേരിട്ട് ബന്ധപ്പെട്ട് വിമാനങ്ങളുടെ സമയം ഉറപ്പുവരുത്തണമെന്ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവള അധികൃതരും യാത്രക്കാർക്ക് നിർദേശം നൽകിയിട്ടുണ്ട്.

സൗദി വ്യോമാതിർത്തി തങ്ങളുടെ സൈനിക പ്രവർത്തന മേഖലയാണെന്നും അവിടെ സർവീസ് നടത്തുന്ന അന്താരാഷ്ട്ര വിമാനക്കമ്പനികൾക്ക് അവസാന മുന്നറിയിപ്പ് നൽകുകയാണെന്നും ഇറാന്റെ പിന്തുണയുള്ള ഹൂതി വിമതർ നേരത്തെ അറിയിച്ചിട്ടുണ്ട്.

റിയാദ്, അബഹ വിമാനത്താവളങ്ങൾക്ക് നേരെ ബുധനാഴ്ച ഹൂതികൾ നടത്തിയ ആക്രമണങ്ങളിൽ മൂന്ന് പേർ കൊല്ലപ്പെട്ടതായി സൗദി അധികൃതർ സ്ഥിരീകരിച്ചിരുന്നു. ഇതിന് പിന്നാലെയാണ് ഇന്ന് വീണ്ടും ആക്രമണമുണ്ടായിരിക്കുന്നത്. വിമാനത്താവളത്തിന് പുറമേ വീണ്ടും ആക്രമണമുണ്ടാവുകയും പോളിക്ലിനിക്കിനും നഴ്‌സറിക്കും കേടുപാടുകൾ പറ്റിയതായി റിപ്പോർട്ട് ചെയ്തിട്ടുണ്ട്.

റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ സുരക്ഷാ പ്രശ്‌നങ്ങളെ തുടർന്ന് കൊച്ചി അന്താരാഷ്ട്ര വിമാനത്താവളത്തിൽ നിന്ന് റിയാദിലേക്കുള്ള രണ്ട് വിമാന സർവീസുകളും വ്യാഴാഴ്ച റദ്ദാക്കിയിട്ടുണ്ട്.