കണ്ണാടിപ്പറമ്പ് സ്വദേശിയുടെ  സ്കൂട്ടറിന് തീപിടിച്ചു.

കണ്ണൂർ : ഓടിക്കൊണ്ടിരുന്ന സ്കൂട്ടറിന് തീപിടിച്ചു. പള്ളിക്കുന്ന് പൊടിക്കുണ്ടിലെ ഹ്യൂണ്ടായ് ഷോറൂമിന് സമീപം വ്യാഴാഴ്ച ഉച്ചയ്ക്ക് 1.45-ഓടെയാണ് സംഭവം. കണ്ണാടിപ്പറമ്പ് ഭാഗത്തുനിന്ന് കണ്ണൂരിലേക്ക് പോകുകയായിരുന്ന മൊയ്തീൻ കണ്ണാടിപ്പറമ്പിന്റെ ഉടമസ്ഥതയിലുള്ള സ്കൂട്ടറിനാണ് തീപിടിച്ചത്.

പൊടിക്കുണ്ട് എത്തിയപ്പോൾ വാഹനം തനിയെ നിന്നുപോയി. ഇതേത്തുടർന്ന് സ്കൂട്ടറിലുണ്ടായിരുന്നവർ റോഡരികിലേക്ക് മാറിയപ്പോഴേക്കും തീപിടിക്കുകയായിരുന്നു. പിന്നാലെ എത്തിയ ലോറിയിൽനിന്ന് അഗ്നിരക്ഷാ ഉപകരണം ഉപയോഗിച്ച് തീയണയ്ക്കാൻ ശ്രമിച്ചെങ്കിലും കഴിഞ്ഞില്ല. കണ്ണൂരിൽനിന്ന് അഗ്നിരക്ഷാസേന എത്തിയപ്പോഴേക്കും വാഹനം പൂർണമായി കത്തിനശിച്ചിരുന്നു. അപകടത്തിൽ ആളപായമില്ല.