തിരുവനന്തപുരം: സംസ്ഥാനത്ത് ഗുണ്ടകള്ക്കും സാമൂഹികവിരുദ്ധര്ക്കും ലഹരിമാഫിയയ്ക്കുമെതിരെ സ്പെഷ്യല് ഡ്രൈവുമായി പോലീസ്. സ്പെഷ്യല് ഡ്രെവിന്റെ ഭാഗമായി 243 പേര് അറസ്റ്റിലായി. ഇതില് 90 പേര് വിവിധ കുറ്റകൃത്യങ്ങളില് ഏര്പ്പെട്ടവരും 153 പേര് വാറണ്ട് കേസിലെ പ്രതികളുമാണ്. 53 പേരെ കരുതല് തടങ്കലിലാക്കുകയും അഞ്ചുപേര്ക്കെതിരെ കാപ്പാ നിയമപ്രകാരം നടപടിയെടുക്കുകയും ചെയ്തു.
സ്പെഷ്യല് ഡ്രൈവുമായി ബന്ധപ്പെട്ട് സംസ്ഥാന പോലീസ് മേധാവിയുടെ അധ്യക്ഷതയില് തിരുവനന്തപുരത്ത് ചേര്ന്ന യോഗത്തില് മുതിര്ന്ന പോലീസ് ഉദ്യോഗസ്ഥര് സ്ഥിതിഗതികള് അവലോകനം ചെയ്തു. സമാധാനാന്തരീക്ഷം തകര്ക്കുന്നവര്ക്കെതിരെ ശക്തമായ നടപടി സ്വീകരിക്കാന് സംസ്ഥാന പോലീസ് മേധാവി ഡോ. ഷെയ്ഖ് ദര്വേഷ് സാഹിബ് സോണല് ഐ.ജിമാര്ക്കും റെയിഞ്ച് ഡി.ഐ.ജിമാര്ക്കും ജില്ലാ പോലീസ് മേധാവിമാര്ക്കും യോഗത്തില് നിര്ദേശം നല്കി.
സ്ത്രീകള്ക്കും കുട്ടികള്ക്കുമെതിരെയുള്ള അതിക്രമങ്ങളില് അടിയന്തര നിയമനടപടി സ്വീകരിക്കണമെന്നും സംസ്ഥാന പോലീസ് മേധാവി നിര്ദേശിച്ചു. ഗുരുതര കുറ്റകൃത്യങ്ങളുമായി ബന്ധപ്പെട്ട് എടുക്കുന്ന കേസുകളിലും പ്രമാദമായ കേസുകളിലും ജില്ലാ പോലീസ് മേധാവിമാര് വ്യക്തിപരമായ ശ്രദ്ധ പതിപ്പിക്കണം. ഇത്തരം കേസുകളില് പ്രതികളെ പിടികൂടുന്നതിന് കൃത്യമായ ഇടവേളകളില് അവലോകന യോഗങ്ങള്
ചേരണമെന്നും പോലീസ് മേധാവി നിര്ദേശിച്ചു.
സാമൂഹികമാധ്യമങ്ങളിലൂടെയും അല്ലാതെയും മയക്കുമരുന്ന് വില്ക്കുന്നവര്ക്കും അവ ഉപയോഗിക്കുന്നവര്ക്കുമെതിരെ ശക്തമായ നടപടി സ്വീകരിക്കും. സംശയകരമായ ഇടപെടല് നടത്തുന്നവരുടെ സൈബര് ഇടങ്ങള് പോലീസ് നിരീക്ഷണത്തിലായിരിക്കും.
രാത്രികാല പട്രോളിങ് സംവിധാനം ശക്തിപ്പെടുത്തും. കണ്ട്രോള് റൂം വാഹനങ്ങളുടെ പ്രവര്ത്തനങ്ങള് നിരീക്ഷിക്കും. കണ്ട്രോള് റൂം വാഹനങ്ങളിലെ പോലീസുകാര്ക്ക് ലഭിക്കുന്ന സന്ദേശങ്ങളിന്മേല് ഉടന് നടപടി സ്വീകരിക്കുന്നുണ്ടോയെന്ന് പരിശോധിക്കണമെന്നും ജില്ലാ പോലീസ് മേധാവിമാര്ക്ക് നിര്ദേശം നല്കിയിട്ടുണ്ട്.
ജൂണില് സ്കൂള് തുറക്കുന്നതുമായി ബന്ധപ്പെട്ടുള്ള ഗതാഗതനിയന്ത്രണങ്ങള് പൊതുജനങ്ങള്ക്കും കുട്ടികള്ക്കും ബുദ്ധിമുട്ടില്ലാത്തവിധം ആസൂത്രണം ചെയ്ത് നടപ്പാക്കണമെന്നും സംസ്ഥാന പോലീസ് മേധാവി ബന്ധപ്പെട്ട ഉദ്യോഗസ്ഥര്ക്ക് നിര്ദേശം നല്കി.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.