🗳️ കൊളച്ചേരി പഞ്ചായത്തിൽ തീപാറിയ പോരാട്ടം: യുഡിഎഫ് ഭരണത്തുടർച്ചയ്ക്ക്; വികസന മുരടിപ്പ് വിഷയമാക്കി എൽഡിഎഫ്

(കൊളച്ചേരി) | മുസ്ലീം ലീഗിന് വ്യക്തമായ മേൽക്കൈയുള്ള യുഡിഎഫ് കോട്ടയായ കൊളച്ചേരി പഞ്ചായത്തിൽ ഇക്കുറി ത്രികക്ഷി പോരാട്ടത്തിനുള്ള കളമൊരുങ്ങുന്നു. ഭരണത്തുടർച്ച ലക്ഷ്യമിട്ട് യുഡിഎഫ് ശക്തമായ നീക്കങ്ങൾ നടത്തുമ്പോൾ, വികസന മുരടിപ്പ് പ്രധാന വിഷയമാക്കി എൽഡിഎഫ് ഭരണത്തെ മറിച്ചിടാൻ തന്ത്രങ്ങൾ മെനയുന്നു. ‘നില മെച്ചപ്പെടുത്തും’ എന്ന പ്രതീക്ഷയിലാണ് എൻഡിഎ ക്യാമ്പ്.

📊 വാർഡ് വിഭജനവും നിലവിലെ സ്ഥാനാർത്ഥി ചിത്രവും

കഴിഞ്ഞ തിരഞ്ഞെടുപ്പിൽ 17 വാർഡുകളിൽ 11 വാർഡുകൾ നേടിയ യുഡിഎഫ് ഭരണം നിലനിർത്തിയിരുന്നു. ഇത്തവണ വാർഡ് വിഭജനത്തിലൂടെ കയ്യങ്കോട്, ചെറുക്കുന്ന് എന്നീ രണ്ട് പുതിയ വാർഡുകൾ കൂടി കൂട്ടിച്ചേർത്തതോടെ ആകെ വാർഡുകളുടെ എണ്ണം വർധിച്ചു.

പ്രധാന മുന്നണികളുടെ സ്ഥാനാർത്ഥി വിഭജനം:

• യുഡിഎഫ്: 19 വാർഡുകളിൽ 10 വാർഡുകളിൽ കോൺഗ്രസും, 9 വാർഡുകളിൽ മുസ്ലീം ലീഗും സ്ഥാനാർത്ഥികളെ നിശ്ചയിച്ചു.

എൽഡിഎഫ് ആകെയുള്ള 19 വാർഡുകളിൽ 17 വാർഡുകളിൽ എൽഡിഎഫ് മത്സരിക്കുന്നത്

ബാക്കിയുള്ള രണ്ട് വാർഡുകളായ നൂഞ്ഞേരി, ചേലേരി എന്നിവിടങ്ങളിൽ ‘മത്സരിക്കുന്ന സ്വതന്ത്ര സ്ഥാനാർത്ഥികൾക്ക് എൽഡിഎഫ് പിന്തുണ നൽകുന്നുണ്ട്. 

• എൻഡിഎ: ഒൻപത് വാർഡുകളിലാണ് എൻഡിഎ സ്ഥാനാർത്ഥികൾ മത്സരിക്കുന്നത്.

• എസ്.ഡി.പി.ഐ.: ആറിടങ്ങളിലാണ് എസ്.ഡി.പി.ഐ. സ്ഥാനാർഥികൾ മത്സരിക്കുന്നത്.

🎯 യുഡിഎഫിന്റെ ലക്ഷ്യം: നഷ്ടപ്പെട്ട സീറ്റുകൾ തിരിച്ചുപിടിക്കുക

നേരിയ വോട്ടുകൾക്ക് കോൺഗ്രസിന് നഷ്ടമായ കൊളച്ചേരിപ്പറമ്പും ചേലേരി സെൻട്രലും തിരിച്ചു പിടിച്ച് ആറ് സീറ്റുകളിൽ മികച്ച വിജയം നേടാമെന്ന പ്രതീക്ഷയിലാണ് കോൺഗ്രസ്. മുസ്ലീം ലീഗിന് ബദലായി കോടിപ്പൊയിലിൽ മത്സരിക്കുന്ന സ്വതന്ത്ര സ്ഥാനാർഥി നോമിനേഷൻ പിൻവലിക്കാനുള്ള സാഹചര്യങ്ങൾ തെളിയുന്നതും യുഡിഎഫിന് അനുകൂലമാവുമെന്നാണ് വിലയിരുത്തൽ.

🤝 വിമതരും സ്വതന്ത്രരും

നൂഞ്ഞേരി, കാരയാപ്പ് എന്നീ വാർഡുകളിൽ വികസന മുന്നണി എന്ന പേരിൽ സ്വതന്ത്ര സ്ഥാനാർഥികളാണ് മത്സര രംഗത്തുള്ളത്. ഇത് യുഡി എഫിന്റെ വോട്ടുകൾ ഭിന്നിപ്പിക്കുമോ എന്ന ആശങ്ക യുഡി എഫിന് ഉണ്ട്.