ഗോവ: പ്രശസ്ത ബോളിവുഡ്-മറാത്തി ചലച്ചിത്ര നടൻ നാനാ പടേക്കർ (75) അന്തരിച്ചു. ഹൃദയാഘാതത്തെത്തുടർന്ന് ഗോവയിലെ സ്വകാര്യ ആശുപത്രിയിലായിരുന്നു അന്ത്യം. സ്വന്തം വീട്ടിൽ ബോധരഹിതനായി കണ്ടെത്തിയ അദ്ദേഹത്തെ ഉടൻ അടുത്തുള്ള ആശുപത്രിയിൽ എത്തിച്ചെങ്കിലും വ്യാഴാഴ്ച രാവിലെ 5:20-ഓടെ മരണം സ്ഥിരീകരിക്കുകയായിരുന്നു.
പതിറ്റാണ്ടുകളോളം ഹിന്ദി, മറാത്തി സിനിമകളിൽ സജീവമായിരുന്ന നാനാ പടേക്കർ ഇന്ത്യയിലെ എക്കാലത്തെയും പ്രതിഭാധനരായ അഭിനേതാക്കളിൽ ഒരാളാണ്. 1951 ജനുവരി ഒന്നിന് മഹാരാഷ്ട്രയിൽ ജനിച്ച അദ്ദേഹത്തിന്റേത് അഞ്ചു പതിറ്റാണ്ടോളം നീണ്ട സിനിമാ ജീവിതമായിരുന്നു. 1978-ൽ പുറത്തിറങ്ങിയ ‘ഗമൻ’ എന്ന ചിത്രത്തിലൂടെയാണ് അദ്ദേഹം അഭിനയരംഗത്തേക്ക് കടന്നുവന്നത്.
നാടകങ്ങളിലും മറാത്തി, ഹിന്ദി സിനിമകളിലും വലിയ സംഭാവനകൾ നൽകിയ അദ്ദേഹം ‘പരിന്ദ’, ‘അങ്കുഷ്’, ‘ക്രാന്തിവീർ’, ‘അഗ്നി സാക്ഷി’, ‘അബ് തക് ഛപ്പൻ’, ‘നടസമ്രാട്ട്’, ‘വെൽക്കം’ തുടങ്ങിയ ശ്രദ്ധേയമായ ചിത്രങ്ങളിലൂടെ വൻ ജനപ്രീതി നേടി. അദ്ദേഹത്തിന്റെ സവിശേഷമായ അഭിനയശൈലിയും സംഭാഷണ ശൈലിയും ഇന്ത്യൻ സിനിമയ്ക്ക് അപൂർവ്വ സമ്മാനമാണ്. ‘ക്രാന്തിവീർ’ എന്ന ചിത്രത്തിലെ പ്രകടനത്തിന് മികച്ച നടനുള്ള ദേശീയ ചലച്ചിത്ര പുരസ്‌കാരവും, 2013-ൽ പത്മശ്രീ നൽകിയും രാജ്യം അദ്ദേഹത്തെ ആദരിച്ചിട്ടുണ്ട്. രജനികാന്തിനൊപ്പം ‘കാല’ എന്ന തമിഴ് ചിത്രത്തിലും അദ്ദേഹം വേഷമിട്ടിട്ടുണ്ട്.
ചലച്ചിത്രരംഗത്തിന് പുറമെ സാമൂഹിക സേവന രംഗത്തും കർഷക ക്ഷേമ പ്രവർത്തനങ്ങളിലും നാനാ പടേക്കർ സജീവമായി പ്രവർത്തിച്ചിരുന്നു. 2015-ൽ മഹാരാഷ്ട്രയിലുണ്ടായ കഠിനമായ വരൾച്ചയും കർഷകരുടെ ആത്മഹത്യകളും കണക്കിലെടുത്ത് അദ്ദേഹം ‘നാം ഫൗണ്ടേഷൻ’ സ്ഥാപിച്ചു. തന്റെ പുരസ്കാരത്തുകകളും സിനിമയിൽനിന്നുള്ള വരുമാനത്തിന്റെ വലിയൊരു പങ്കും അദ്ദേഹം കർഷകരെ സഹായിക്കുന്നതിനാണ് നീക്കിവെച്ചിരുന്നത്.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.