റിയാദ്: സൗദി മണ്ണിൽ ഒരു കിരീടത്തിനായുള്ള പോർചുഗീസ് ഇതിഹാസം ക്രിസ്റ്റ്യാനോ റൊണാൾഡോയുടെ കാത്തിരിപ്പിന് വിരാമം. ലീഗിലെ അവസാന റൗണ്ട് മത്സരത്തിൽ ദമാക്കിനെ ഒന്നിനെതിരെ നാലു ഗോളുകൾക്ക് തകർത്ത് അൽ നസ്ർ സൗദി പ്രോ ലീഗ് ചാമ്പ്യന്മാരായി. ഏഴു വർഷത്തെ ഇടവേളക്കുശേഷമാണ് അൽ നസ്ർ ലീഗ് കിരീടത്തിൽ മുത്തമിടുന്നത്. 2023 ജനുവരിയിൽ ക്ലബിലെത്തിയശേഷമുള്ള ക്രിസ്റ്റ്യാനോയുടെ ആദ്യ ലീഗ് കിരീടമാണിത്.
ഇരട്ട ഗോളുകളുമായി ക്രിസ്റ്റ്യാനോ
മത്സരത്തിൽ ക്രിസ്റ്റ്യാനോ റൊണാൾഡോ ഇരട്ട ഗോളുകളുമായി തിളങ്ങി. 62, 80 മിനിറ്റുകളിലായിരുന്നു സി.ആർ 7-ന്റെ ഗോളുകൾ. സാദിയോ മനെ (33′), കിങ്സ്ലി കോമാൻ (51′) എന്നിവരും അൽ നസ്റിനായി വലകുലുക്കി. 57-ാം മിനിറ്റിൽ ലഭിച്ച പെനാൽറ്റിയിൽനിന്ന് മോർലായെ സില്ലയാണ് ദമാക്കിന്റെ ആശ്വാസ ഗോൾ നേടിയത്.
പോയിന്റ് പട്ടികയിൽ ഒന്നാമത്
34 മത്സരങ്ങളിൽനിന്ന് 86 പോയന്റുമായാണ് നസ്ർ ചാമ്പ്യന്മാരായത്. അൽ ഹിലാലും അൽ അഹ്ലിയും യഥാക്രമം രണ്ടും മൂന്നും സ്ഥാനങ്ങളിൽ ഫിനിഷ് ചെയ്തു. ലീഗ് ചരിത്രത്തിൽ അൽ നസ്റിന്റെ 11-ാം കിരീട വിജയമാണിത്. മാഞ്ചസ്റ്റർ യുനൈറ്റഡ്, റയൽ മാഡ്രിഡ്, യുവന്റസ് എന്നിവർക്കൊപ്പമുള്ള വിജയങ്ങൾക്ക് ശേഷം ക്രിസ്റ്റ്യാനോയുടെ കരിയറിലെ എട്ടാമത്തെ ലീഗ് ചാമ്പ്യൻഷിപ്പ് വിജയം കൂടിയാണിത്. ഈ സീസണിൽ ക്രിസ്റ്റ്യാനോയുടെ ലീഗ് ഗോളുകളുടെ എണ്ണം 28 ആയി.
ഇനി ലക്ഷ്യം ലോകകപ്പ്
കിരീട വിജയത്തിന്റെ ആത്മവിശ്വാസത്തിൽ ക്രിസ്റ്റ്യാനോ ഇനി പോർചുഗലിന്റെ ലോകകപ്പ് സ്ക്വാഡിനൊപ്പം ചേരും. ഇത് താരത്തിന്റെ ആറാമത്തെ ലോകകപ്പാണ്. ബ്രൂണോ ഫെർണാണ്ടസ്, ബെർണാഡോ സിൽവ, വിറ്റിന തുടങ്ങിയ സൂപ്പർ താരങ്ങൾ ഉൾപ്പെടുന്ന ടീമിനെ ക്രിസ്റ്റ്യാനോ തന്നെയാണ് നയിക്കുന്നത്. ജൂൺ 17ന് ഡി.ആർ കോംഗോക്കെതിരെയാണ് ലോകകപ്പിൽ പോർചുഗലിന്റെ ആദ്യ മത്സരം.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.