മട്ടന്നൂർ: ആഭ്യന്തര മന്ത്രി രമേശ് ചെന്നിത്തലയെ സമൂഹമാധ്യമങ്ങളിലൂടെ അധിക്ഷേപിച്ച കേസിൽ സൈബർ പൊലീസിന്റെ കസ്റ്റഡിയിലുള്ള അർജുൻ ആയങ്കിയെ മട്ടന്നൂരിൽ എത്തിച്ച് തെളിവെടുപ്പ് നടത്തി. ഒളിവിൽ കഴിഞ്ഞിരുന്ന സമയത്ത് സഞ്ചരിച്ച വഴികളിലൂടെയാണ് അന്വേഷണ സംഘം പ്രതിയുമായി തെളിവെടുപ്പ് നടത്തിയത്.
ഒളിവിൽ കഴിഞ്ഞ ദിവസങ്ങളിൽ പൊലീസിനെ വെല്ലുവിളിച്ച് സമൂഹമാധ്യമങ്ങളിൽ പോസ്റ്റുകൾ ഇടാൻ ഉപയോഗിച്ച മൊബൈൽ ഫോൺ അന്വേഷണ സംഘം കണ്ടെത്തിയിട്ടുണ്ട്. കണ്ണൂർ സൈബർ പൊലീസിന്റെ തെളിവെടുപ്പിനിടയിൽ ആയങ്കിയുടെ അഭിഭാഷകയുടെ അപ്പാർട്ട്മെന്റിന് സമീപത്തുനിന്നാണ് ഈ നിർണായക തെളിവ് കണ്ടെടുത്തത്. വിവിധ സ്ഥലങ്ങളിലെ വൈഫൈ ഉപയോഗിച്ചാണ് താൻ പോസ്റ്റുകൾ ഇട്ടതെന്ന് ആയങ്കി പൊലീസിന് മൊഴി നൽകിയിട്ടുണ്ട്. ഈ സ്ഥലങ്ങളിലും പ്രതിയുമായി വരും ദിവസങ്ങളിൽ തെളിവെടുപ്പ് നടത്തും.
കൂടുതൽ ഉപകരണങ്ങൾ പരിശോധനയ്ക്ക്
പിടിച്ചെടുത്ത ഫോണുകളും വീട്ടിൽ നിന്നും കണ്ടെടുത്ത ലാപ്ടോപ്പും ഉടൻ തന്നെ ശാസ്ത്രീയ പരിശോധനക്ക് അയക്കുമെന്ന് പൊലീസ് അറിയിച്ചു. അറസ്റ്റ് ചെയ്തപ്പോൾ പിടികൂടിയ ഫോണിൽ നിന്നല്ല പോസ്റ്റുകൾ വന്നതെന്നാണ് പൊലീസിന്റെ വിലയിരുത്തൽ. തലശ്ശേരി ചീഫ് ജുഡീഷ്യൽ മാജിസ്ട്രേറ്റ് കോടതി മൂന്നു ദിവസത്തെ കസ്റ്റഡിയാണ് അനുവദിച്ചത്. വെള്ളിയാഴ്ച രാവിലെ പതിനൊന്നര വരെയാണ് കസ്റ്റഡി കാലാവധി ഉള്ളത്.
കാപ്പ ചുമത്താൻ നീക്കം
അതിനിടെ, അർജുൻ ആയങ്കിക്കെതിരെ കാപ്പ (KAAPA) ചുമത്തുന്നതിനുള്ള കേസ് ഹിസ്റ്ററി റിപ്പോർട്ട് വളപട്ടണം ഇൻസ്പെക്ടർ പൊലീസ് കമ്മീഷണർക്ക് കൈമാറി. ഇത് ഉടൻ ജില്ലാ കലക്ടർക്ക് സമർപ്പിക്കും. കണ്ണൂർ സൈബർ പൊലീസ് എസ്.എച്ച്.ഒ എ. അനൂപിന്റെ നേതൃത്വത്തിലുള്ള സംഘം അർജുൻ ആയങ്കിയുടെ വീട്ടിൽ നടത്തിയ പരിശോധനയിൽ ലാപ്ടോപ്പ് പിടിച്ചെടുത്തിരുന്നു. ഇവിടെ നിന്നും അമ്മയുടെയും സഹോദരൻ അജയ് ആയങ്കിയുടെയും മൊഴികളും രേഖപ്പെടുത്തിയിട്ടുണ്ട്. ഡിലീറ്റ് ചെയ്തതടക്കമുള്ള ഡിജിറ്റൽ തെളിവുകൾ ശാസ്ത്രീയ പരിശോധനയിലൂടെ വീണ്ടെടുക്കാനാണ് പൊലീസിന്റെ ശ്രമം.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.