കണ്ണൂര്: തീരദേശ മേഖലയിലെ വനിതകള് നേരിടുന്ന പ്രശ്നങ്ങള് മനസിലാക്കുന്നതിനായി കണ്ണൂര് ജില്ലയിലെ തീരദേശ മേഖലയില് നവംബര് 28നും 29നും വനിതാ കമ്മിഷന് ക്യാമ്പ് സംഘടിപ്പിക്കും. ക്യാമ്പിന്റെ ഭാഗമായി നവംബര് 28ന് ഉച്ചകഴിഞ്ഞ് 2.30ന് അഴീക്കോട് ആത്മ വിദ്യമന്ദിറില് ഗാര്ഹിക അതിക്രമങ്ങളില് നിന്നും വനിതകളെ സംരക്ഷിക്കുന്നതിനുള്ള നിയമം 2005 എന്ന വിഷയത്തില് സംഘടിപ്പിക്കുന്ന സെമിനാര് വനിതാ കമ്മിഷന് അധ്യക്ഷ അഡ്വ. പി. സതീദേവി ഉദ്ഘാടനം ചെയ്യും. അഴീക്കോട് ഗ്രാമപഞ്ചായത്ത് പ്രസിഡന്റ് കെ. അജീഷ് അധ്യക്ഷത വഹിക്കും.
അഡ്വ. പ്രസന്ന മണികണ്ഠന് ക്ലാസ് നയിക്കും. വനിതാ കമ്മിഷന് അംഗങ്ങളായ അഡ്വ. പി. കുഞ്ഞായിഷ, അഡ്വ. ഇന്ദിരാ രവീന്ദ്രന്, വി.ആര്. മഹിളാമണി, കണ്ണൂര് ജില്ലാ പഞ്ചായത്ത് പൊതുമരാമത്ത് സ്ഥിരം സമിതി അധ്യക്ഷ അഡ്വ. ടി. സരള, അഴിക്കോട് ഗ്രാമപഞ്ചായത്ത് വൈസ് പ്രസിഡന്റ് എ. റീന, വനിതാ കമ്മിഷന് പ്രോജക്ട് ഓഫീസര് എന്. ദിവ്യ എന്നിവര് സംസാരിക്കും.
നവംബര് 29ന് ഉച്ചകഴിഞ്ഞ് രണ്ടിന് മുഴപ്പിലങ്ങാട് മത്സ്യ തൊഴിലാളികളുടെ വീടുകള് വനിതാ കമ്മിഷന് സന്ദര്ശിക്കും. ഉച്ചകഴിഞ്ഞ് മൂന്നിന് തീരദേശ മേഖലയിലെ വനിതകളുടെ ഉന്നമനത്തിനായി സര്ക്കാര് നടപ്പാക്കുന്ന പ്രവര്ത്തനങ്ങളുടെയും പദ്ധതികളുടെയും വിശദാംശങ്ങള് ചര്ച്ച ചെയ്യുന്നതിനായി വിവിധ വകുപ്പുകളിലെ ഉദ്യോഗസ്ഥര് ഉള്പ്പെടെ പങ്കെടുക്കുന്ന ഏകോപന യോഗം മുഴപ്പിലങ്ങാട് കമ്മ്യൂണിറ്റി ഹാളില് വനിതാ കമ്മിഷന് അധ്യക്ഷ അഡ്വ. പി. സതീദേവി ഉദ്ഘാടനം ചെയ്യും.
മുഴപ്പിലങ്ങാട് ഗ്രാമപഞ്ചായത്ത് പ്രസിഡന്റ് ടി. സജിത അധ്യക്ഷത വഹിക്കും. വനിതാ കമ്മിഷന് അംഗങ്ങളായ അഡ്വ. പി. കുഞ്ഞായിഷ, അഡ്വ. ഇന്ദിരാ രവീന്ദ്രന്, വി.ആര്. മഹിളാമണി, ജില്ലാപഞ്ചായത്ത് അംഗം കെ.വി. ബിജു, മുഴപ്പിലങ്ങാട് ഗ്രാമപഞ്ചായത്ത് വൈസ് പ്രസിഡന്റ് സി. വിജേഷ്, തലശേരി ബ്ലോക്ക് പഞ്ചായത്ത് വിദ്യാഭ്യാസ സ്ഥിരം സമിതി അധ്യക്ഷ കെ.ടി. ഫര്സാന, മുഴപ്പിലങ്ങാട് ബ്ലോക്ക് പഞ്ചായത്ത് വിദ്യാഭ്യാസ സ്ഥിരം സമിതി അധ്യക്ഷ കെ.വി. റജീന, സിഡിഎസ് ചെയര്പേഴ്സണ് ടി.വി. നിമിഷ, വനിതാ കമ്മിഷന് പ്രോജക്ട് ഓഫീസര് എന്. ദിവ്യ എന്നിവര് സംസാരിക്കും. വനിതാ കമ്മിഷന് റിസര്ച്ച് ഓഫീസര് എ.ആര്. അര്ച്ചന ചര്ച്ച നയിക്കും.
തീരദേശ മേഖലകളില് സ്ത്രീകള് നേരിടുന്ന പ്രശ്നങ്ങളും അവിടുത്തെ ഭൗതിക, സാമൂഹ്യ സാഹചര്യങ്ങളും നേരിട്ട് മനസിലാക്കുന്നതിനും പരിഹാര നിര്ദേശങ്ങള് സര്ക്കാരിനു സമര്പ്പിക്കുന്നതിനുമാണ് തീരദേശ ക്യാമ്പ് സംഘടിപ്പിച്ചിട്ടുള്ളതെന്ന് വനിതാ കമ്മിഷന് അധ്യക്ഷ അഡ്വ. പി. സതീദേവി അറിയിച്ചു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.