ധർമ്മടം: നിയമസഭാ തിരഞ്ഞെടുപ്പിൽ ഏറ്റവും കൂടുതൽ ശ്രദ്ധാകേന്ദ്രമാകുന്ന ധർമ്മടം മണ്ഡലത്തിൽ പോര് മുറുകുന്നു. കഴിഞ്ഞ പത്ത് വർഷമായി മണ്ഡലത്തെ പ്രതിനിധീകരിക്കുന്ന മുഖ്യമന്ത്രി പിണറായി വിജയനെതിരെ യൂത്ത് കോൺഗ്രസ് സംസ്ഥാന ജനറൽ സെക്രട്ടറിയും കെ.പി.സി.സി അംഗവുമായ വി.പി. അബ്ദുൾ റഷീദിനെ സ്ഥാനാർഥിയാക്കാൻ കോൺഗ്രസ് ആലോചിക്കുന്നതായി റിപ്പോർട്ട്.
മണ്ഡലം മാറ്റത്തിന് പിന്നിൽ:
തളിപ്പറമ്പ് മണ്ഡലത്തിലായിരുന്നു അബ്ദുൾ റഷീദിനെ ആദ്യം മത്സരിപ്പിക്കാൻ തീരുമാനിച്ചിരുന്നത്. എന്നാൽ അവിടെ സി.പി.എം വിമതനായി മത്സരിക്കുന്ന ടി.കെ. ഗോവിന്ദന് കോൺഗ്രസ് പിന്തുണ നൽകാൻ തീരുമാനിച്ചതോടെയാണ് അബ്ദുൾ റഷീദിനെ ധർമ്മടത്തേക്ക് പരിഗണിക്കുന്നത്. കഴിഞ്ഞ തിരഞ്ഞെടുപ്പിൽ എം.വി. ഗോവിന്ദനെതിരെ മത്സരിച്ച അബ്ദുൾ റഷീദ്, നാൽപ്പതിനായിരത്തിനടുത്തുണ്ടായിരുന്ന ഭൂരിപക്ഷം 22,000-ലേക്ക് കുറച്ചിരുന്നു. ഡൽഹിയിൽ ചേരുന്ന കേന്ദ്ര തിരഞ്ഞെടുപ്പ് സമിതി യോഗത്തിന് ശേഷം കോൺഗ്രസിൻ്റെ ആദ്യഘട്ട പട്ടിക ഇന്ന് പ്രഖ്യാപിക്കുമെന്നാണ് വിവരം.
മുഖ്യമന്ത്രിയുടെ പ്രചാരണത്തിന് ഇന്ന് തുടക്കം:
ധർമ്മടത്ത് മൂന്നാം തവണ ജനവിധി തേടുന്ന മുഖ്യമന്ത്രി പിണറായി വിജയന്റെ തിരഞ്ഞെടുപ്പ് പ്രചാരണത്തിന് ഇന്ന് തുടക്കമാകും. സ്ഥാനാർഥി പ്രഖ്യാപനത്തിനു ശേഷം ആദ്യമായി മണ്ഡലത്തിലേക്ക് എത്തുന്ന മുഖ്യമന്ത്രിക്ക് വൻ സ്വീകരണമാണ് പാർട്ടി ഒരുക്കിയിട്ടുള്ളത്. വൈകിട്ട് 3:30-ന് മട്ടന്നൂർ എയർപോർട്ട് മുതൽ പിണറായി വരെ റോഡ് ഷോ നടക്കും. വരും ദിവസങ്ങളിൽ വോട്ടർമാരെ നേരിട്ട് കണ്ടുള്ള പ്രചാരണവുമായി അദ്ദേഹം മണ്ഡലത്തിൽ സജീവമാകും.
അതേസമയം, സി.പി.എം വിട്ട ടി.കെ. ഗോവിന്ദന്റെയും വി. കുഞ്ഞികൃഷ്ണന്റെയും സ്ഥാനാർഥിത്വം കണ്ണൂർ ജില്ലയിൽ പാർട്ടിക്ക് വലിയ വെല്ലുവിളിയാണ് ഉയർത്തുന്നത്. ഈ സാഹചര്യത്തിൽ തളിപ്പറമ്പിലും പയ്യന്നൂരും മുഖ്യമന്ത്രി നേരിട്ട് എത്തി പ്രചാരണത്തിന് നേതൃത്വം നൽകിയേക്കുമെന്നും സൂചനകളുണ്ട്.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.