കുണിയ (കാസർഗോഡ്): വിശ്വാസി ലക്ഷങ്ങളെ സാക്ഷിനിർത്തി സമസ്ത കേരള ജംഇയ്യത്തുൽ ഉലമയുടെ നൂറാം വാർഷിക ആഘോഷങ്ങൾക്ക് കാസർഗോഡ് കുണിയയിൽ ചരിത്രപരമായ സമാപനം. കേരളം, കർണ്ണാടക, തമിഴ്നാട് തുടങ്ങി വിവിധ സംസ്ഥാനങ്ങളിൽ നിന്നും വിദേശ രാജ്യങ്ങളിൽ നിന്നുമായി ഒഴുകിയെത്തിയ ജനസഹസ്രങ്ങൾ കുണിയയിലെ വരക്കൽ മുല്ലക്കോയ തങ്ങൾ നഗറിനെ തൂവെള്ള സാഗരമാക്കി മാറ്റി.
സമ്മേളന ഉദ്ഘാടനം:
ഈജിപ്തിലെ ലോകപ്രശസ്തമായ അൽ അസ്ഹർ ഇസ്ലാമിക് സർവ്വകലാശാല റെക്ടർ ഡോ. സലാമ അലി ദാവൂദ് സമാപന പൊതുസമ്മേളനം ഉദ്ഘാടനം ചെയ്തു. സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ അധ്യക്ഷത വഹിച്ചു. മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങൾ മുഖ്യപ്രഭാഷണം നടത്തി. സമസ്ത ജനാറൽ സെക്രട്ടറി പ്രൊഫ. കെ. ആലിക്കുട്ടി മുസ്ലിയാർ ശതാബ്ദി സന്ദേശം നൽകി.
ഐക്യ ആഹ്വാനം:
സുന്നി സംഘടനകളുടെ ഐക്യത്തിനായുള്ള സുപ്രധാന ആഹ്വാനം സമ്മേളനത്തിൽ ഉയർന്നു. മാതൃസംഘടനയിൽ നിന്ന് അകന്നുപോയവർ തിരികെ വരണമെന്ന് ജിഫ്രി മുത്തുക്കോയ തങ്ങൾ ആവശ്യപ്പെട്ടു. സമസ്തയുടെ കരുത്ത് ലോകത്തിന് ബോധ്യപ്പെട്ട നിമിഷമാണിതെന്നും പ്രശ്നങ്ങൾ തീർത്ത് ഒത്തൊരുമിച്ച് മുന്നോട്ട് പോകണമെന്നും അദ്ദേഹം അധ്യക്ഷ പ്രസംഗത്തിൽ പറഞ്ഞു.
പ്രധാന പ്രമേയങ്ങൾ:
വിശ്വാസികളുടെ അവകാശങ്ങൾ സംരക്ഷിക്കണമെന്നാവശ്യപ്പെട്ട് പ്രധാന പ്രമേയങ്ങൾ സമ്മേളനത്തിൽ അവതരിപ്പിച്ചു:
• പെരുന്നാൾ അവധി: രണ്ട് പെരുന്നാളുകൾക്കും കുറഞ്ഞത് മൂന്ന് ദിവസം വീതം ഔദ്യോഗിക അവധി അനുവദിക്കണം.
• പരീക്ഷാ സമയം: ജുമുഅ നമസ്കാരത്തിന് തടസ്സമാകാത്ത രീതിയിൽ പരീക്ഷാ സമയക്രമം നിശ്ചയിക്കണം.
• മദ്രസ സമയം: മദ്രസ സമയ മാറ്റ വിഷയത്തിൽ സർക്കാർ നൽകിയ ഉറപ്പുകൾ ഉത്തരവായി നടപ്പിലാക്കണം.
പ്രമുഖരുടെ സാന്നിധ്യം:
ലാലു ഇന്റർനാഷണൽ ഗ്രൂപ്പ് ചെയർമാൻ എം.എ. യൂസഫലിക്ക് സമസ്ത ശതാബ്ദി അവാർഡ് ചടങ്ങിൽ സമ്മാനിച്ചു. മുഖ്യമന്ത്രി പിണറായി വിജയൻ, കർണ്ണാടക ഉപമുഖ്യമന്ത്രി ഡി.കെ. ശിവകുമാർ, പ്രതിപക്ഷ നേതാവ് വി.ഡി. സതീശൻ, പി.കെ. കുഞ്ഞാലിക്കുട്ടി, ഇ.ടി. മുഹമ്മദ് ബഷീർ, എം.എം. ഹസ്സൻ, മണിശങ്കർ അയ്യർ, ഗൾഫാർ മുഹമ്മദലി തുടങ്ങിയ പ്രമുഖ രാഷ്ട്രീയ-സാമൂഹിക നേതാക്കൾ സമ്മേളനത്തിൽ പങ്കെടുത്തു.
ദേശീയതലത്തിൽ വിദ്യാഭ്യാസ പദ്ധതികൾ വ്യാപിപ്പിക്കുമെന്നും സൗഹൃദവും സഹിഷ്ണുതയും നിലനിർത്തിയാകും സമസ്തയുടെ പ്രവർത്തനമെന്നും നേതൃത്വം വ്യക്തമാക്കി. 33,313 പ്രതിനിധികൾ പങ്കെടുത്ത ക്യാമ്പും ഇതോടെ സമാപിച്ചു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.