തലശ്ശേരി: കണ്ണൂർ പയ്യാമ്പലം ബീച്ചിൽ ചാലാട് സ്വദേശിയായ പി.എം. ഷൈജുവിനെ അടിച്ചുകൊലപ്പെടുത്തിയ കേസിൽ പ്രതി കുറ്റക്കാരനാണെന്ന് കോടതി കണ്ടെത്തി. തലശ്ശേരി രണ്ടാം അഡീഷണൽ ജില്ലാ സെഷൻസ് കോടതി ജഡ്ജി ടിറ്റി ജോർജ് മുമ്പാകെയാണ് വിചാരണ നടന്നത്. പ്രതിക്കുള്ള ശിക്ഷ ഈ മാസം 4-ന് (ബുധനാഴ്ച) കോടതി പ്രഖ്യാപിക്കും.
എറണാകുളം വൈപ്പിൻ സ്വദേശിയും പയ്യാമ്പലത്തെ പറമ്പ് കാവൽക്കാരനുമായ എം.വി. ശ്രീഗുരു (44) ആണ് കേസിലെ പ്രതി. 2018 ഡിസംബർ 13-നായിരുന്നു സംഭവം. ഷൈജുവും പ്രതിയും സുഹൃത്തുക്കളും ചേർന്ന് മദ്യപിച്ചതിന് പിന്നാലെ പ്രതി പ്രകൃതിവിരുദ്ധ പീഡനത്തിന് ശ്രമിച്ചതാണ് കൊലപാതകത്തിന് കാരണമായതെന്നാണ് പോലീസ് കുറ്റപത്രം. ഷെഡിൽ സൂക്ഷിച്ചിരുന്ന മരവടി കൊണ്ട് തലയ്ക്കും കഴുത്തിനും അടിയേറ്റ ഷൈജുവിനെ അബോധാവസ്ഥയിൽ പള്ളിയാംമൂലയിലെ ആൾപാർപ്പില്ലാത്ത കാടുപിടിച്ച പറമ്പിൽ ഉപേക്ഷിക്കുകയായിരുന്നു. കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിൽ കഴിയവേയാണ് ഷൈജു മരണപ്പെട്ടത്.
കണ്ണൂർ എ.സി.പി പ്രദീപൻ കണ്ണിപൊയിലിന്റെ നേതൃത്വത്തിലാണ് അന്വേഷണം പൂർത്തിയാക്കി കുറ്റപത്രം സമർപ്പിച്ചത്. പോലീസ് ഓഫീസർമാരായ ടി.കെ. രത്നകുമാർ, പി.കെ. ദിനേഷ് കുമാർ, അനീഷ് കുമാർ, ശ്രീജിത്ത് കൊടേരി, ഷിമ പി.വി., ഷാലി റൊസാരിയോ, രാജേഷ് പി. അരുൺ എന്നിവരും ഡോ. ബിന്ദു, ഡോ. ബിലാൽ ബി.പി., ഡോ. രേഗിന കെ.ബി., ഡോ. പ്രിയ, സയന്റിഫിക് ഓഫീസർ ശ്രുതി ലേഖ കെ.എസ്., കോർപ്പറേഷൻ ഉദ്യോഗസ്ഥ രമണി, വില്ലേജ് ഓഫീസർ സി. ദിലീപൻ, കെ.പി. രഞ്ചിത്ത് കുമാർ, സചീന്ദ്ര കുമാർ വി., ശ്രീരാഗ് കെ.എം., ഷാജി ടി.പി., ശാരദ പി., സജിത്ത് കെ. തുടങ്ങിയവരാണ് പ്രോസിക്യൂഷൻ സാക്ഷികൾ. പ്രോസിക്യൂഷന് വേണ്ടി അഡീഷണൽ ജില്ലാ ഗവ. പ്ലീഡർ അഡ്വ. വി.എസ്. ജയശ്രീ ഹാജരായി.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.