തിരുവനന്തപുരം: കേരളത്തിന്റെ യഥാർത്ഥ സാമ്പത്തിക സ്ഥിതി വ്യക്തമാക്കിക്കൊണ്ട് സർക്കാർ നിയമസഭയിൽ സമർപ്പിച്ച ധവളപത്രത്തിലെ ഞെട്ടിക്കുന്ന വിവരങ്ങൾ പുറത്ത്. സംസ്ഥാനത്തിന്റെ ആകെ കടബാധ്യത 5.07 ലക്ഷം കോടി രൂപയായി ഉയർന്നുവെന്ന് ധവളപത്രം വ്യക്തമാക്കുന്നു. 2026-ൽ അധികാരത്തിലെത്തിയ പുതിയ സർക്കാരിന് ലഭിച്ചത് ഗുരുതരമായ ധനകാര്യ പാരമ്പര്യമാണെന്ന് റിപ്പോർട്ട് വിലയിരുത്തുന്നു. ജീവനക്കാരുടെയും പെൻഷൻകാരുടെയും ഡി.എ കുടിശ്ശികകൾ ഉൾപ്പെടെ 48,733 കോടി രൂപയുടെ കുടിശ്ശിക ബാധ്യതകളാണ് പുതിയ സർക്കാരിന് ഏറ്റെടുക്കേണ്ടി വന്നിരിക്കുന്നത്.
സംസ്ഥാനത്തിന്റെ വരുമാനത്തിൽ ഭൂരിഭാഗവും ദൈനംദിന ചെലവുകൾക്കായിട്ടാണ് മാറ്റിവെക്കുന്നത്. വരുമാനത്തിന്റെ 77 ശതമാനവും ശമ്പളം, പെൻഷൻ, പലിശ എന്നിവയ്ക്കായി മാത്രം ചെലവാകുമ്പോൾ വികസന പ്രവർത്തനങ്ങൾക്കുള്ള മൂലധന ചെലവ് രാജ്യത്തെ ഏറ്റവും താഴ്ന്ന നിരക്കിലാണെന്ന് റിപ്പോർട്ട് ചൂണ്ടിക്കാട്ടുന്നു. വിവാദമായ കിഫ്ബിക്ക് (KIIFB) നിലവിൽ 21,000 കോടി രൂപയുടെ വായ്പാബാധ്യതയുണ്ട്. ഇത് യഥാർത്ഥത്തിൽ സംസ്ഥാനത്തിന്റെ തന്നെ കടമാണെന്ന് റിപ്പോർട്ടിൽ പറയുന്നു. ഇതിനുപുറമെ കെ.എസ്.ആർ.ടി.സി, വാട്ടർ അതോറിറ്റി തുടങ്ങിയ പൊതുമേഖലാ സ്ഥാപനങ്ങളുടെ ആകെ സഞ്ചിത നഷ്ടം 78,851 കോടി രൂപയായി ഉയർന്നതും തിരിച്ചടിയായി.
രൂക്ഷമായ ട്രഷറി പ്രതിസന്ധി
സംസ്ഥാനത്തെ ട്രഷറി പ്രതിസന്ധി കഴിഞ്ഞ ഒരു ദശാബ്ദമായി ക്രമേണ രൂക്ഷമായതാണെന്ന് ധവളപത്രം വിലയിരുത്തുന്നു. കൊവിഡിന് മുൻപ്, അതായത് 2016-17ൽ 1,950 കോടി രൂപയുണ്ടായിരുന്ന ട്രഷറി ബാലൻസ് 2019-20ൽ 530 കോടിയുടെ നെഗറ്റീവ് ബാലൻസായി മാറി. കൊവിഡ് കാലത്ത് ലഭിച്ച കേന്ദ്ര ഗ്രാന്റുകളും വിപണി വായ്പകളും വഴി താൽക്കാലികമായി മെച്ചപ്പെട്ടെങ്കിലും 2024-25ൽ കേന്ദ്രസഹായം അവസാനിച്ചതോടെ പ്രതിസന്ധി വീണ്ടും രൂക്ഷമായി. 2024-25ൽ 12 മാസങ്ങളിൽ 10 മാസവും ട്രഷറി നെഗറ്റീവ് ബാലൻസിലായിരുന്നു. ചെലവുകൾ നിറവേറ്റാൻ 2025-ൽ മാത്രം കേരളത്തിന് 262 ദിവസം റിസർവ് ബാങ്കിന്റെ വേയ്സ് ആൻഡ് മീൻസ് അഡ്വാൻസസിനെയും (WMA) 84 ദിവസം ഓവർ ഡ്രാഫ്റ്റിനെയും (OD) ആശ്രയിക്കേണ്ടി വന്നു.
സാമ്പത്തിക അച്ചടക്കവും സുതാര്യതയും ഉറപ്പാക്കാതെ സംസ്ഥാനത്തിന് മുന്നോട്ടുപോകാനാകില്ലെന്ന് ധവളപത്രം മുന്നറിയിപ്പ് നൽകുന്നു. ഇതിന് ദീർഘകാല പരിഹാരമായി സ്വകാര്യ നിക്ഷേപം, വ്യവസായ വികസനം, അടിസ്ഥാനസൗകര്യ വികസനം എന്നിവ പ്രോത്സാഹിപ്പിക്കണമെന്നും റിപ്പോർട്ട് ശുപാർശ ചെയ്യുന്നു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.