ചേലേരിമുക്കിലെ ബസ് സ്റ്റോപ്പുകൾ പുനർ നിർണയിച്ചത് അപ്രായോഗികമെന്ന് വെൽഫെയർ പാർട്ടി

ചേലേരി :മാസങ്ങളോളം ചർച്ചചെയ്ത് പഞ്ചായത്ത് അധികൃതരും വികസന സമിതിയും കണ്ടെത്തിയ ചേലേരി മുക്കിലെ ബസ് സ്റ്റോപ്പുകളുടെ പുന: ക്രമീകരണ പരിഷ്കാരം യാത്രക്കാരെ നെട്ടോട്ടമോടിക്കുന്നതാണെന്ന് വെൽഫെയർ പാർട്ടി കൊളച്ചേരി പഞ്ചായത്ത്‌ കമ്മിറ്റി യോഗം അഭിപ്രായപ്പെട്ടു.
കൊളച്ചേരി ഭാഗത്ത് നിന്ന് കണ്ണൂർ ഭാഗത്ത് പോകേണ്ട ബസ്സുകൾ കൊളച്ചേരി സർവീസ് സഹകരണ ബാ ങ്കിനടുത്ത് നിർത്താനും മുണ്ടേരിക്കടവ് നിന്ന് കണ്ണൂർ ഭാഗത്തേക്ക് പോകുന്ന ബസ്സുകൾ സൂക്ക് സൂപ്പർ മാർക്കറ്റിനടുത്ത് നിർത്താനും തീരുമാനമായത് കാരണം കണ്ണൂരിലേക്ക് പോകേണ്ട യാത്രക്കാർ ബസ് വരുന്നതനുസരിച്ച് പരക്കം പായേണ്ടിവരുമെന്നുമാണ് പാർട്ടിയുടെ വിലയിരുത്തൽ.
ഏപ്രിൽ 9 -ന് തീരുമാനം നിലവിൽ വരുന്നതിന് മുന്നെ കൊളച്ചേരി ഭാഗത്തേക്ക് പോകുന്ന ബസ്സുകൾ കൊളച്ചേരി സർവ്വീസ് സഹകരണ ബാങ്കിനടുത്തും കണ്ണൂരിലേക്ക് പോകുന്ന മുഴുവൻ ബസ്സുകളും അപ്പു വൈദ്യർ വായനശാലക്ക് സമീപവും മുണ്ടേരിക്കടവ് പോകുന്ന ബസ്സുകൾ സൂക്ക് സൂപ്പർ മാർക്കറ്റിന് സമീപവും നിർത്തലാണ് നിലവിൽ ഏറ്റവും പ്രായോഗികമായ രീതി എന്നും പാർട്ടി നിർദേശിച്ചു. യോഗത്തിൽ പ്രസിഡന്റ്‌ നിഷ്താർ. കെ. കെ, സെക്രട്ടറി മുഹമ്മദ്‌ എംവി, നൗഷാദ് മാസ്റ്റർ, അനീഷ് പാലച്ചാൽ, അസ്‌ലം ഏ. വി. തുടങ്ങിയവർ സംസാരിച്ചു.