നാറാത്ത് പഞ്ചായത്ത് നാളെ യു.ഡി.എഫ് ഉപരോധിക്കും

നാറാത്ത്: യു.ഡി.എഫിന്റെ നേതൃത്വത്തിൽ നാറാത്ത് ഗ്രാമ പഞ്ചായത്ത് ഉപരോധം നാളെ. നാറാത്ത് പഞ്ചായത്ത് MGNRGES AE, ഓവർസിയർ എന്നിവർ തൊഴിലുറപ്പ് പദ്ധതി പ്രവൃത്തിയിൽ കൃത്യവിലോപം നടത്തിയെന്നാരോപിച്ച് ഇവരെ സസ്പെന്റ് ചെയ്യാനാവശ്യപ്പെട്ട് നാറാത്ത് ഗ്രാമ പഞ്ചായത്ത് സെക്രട്ടറിയെ നാളെ രാവിലെ 10 മണിക്ക് ഉപരോധിക്കും.
പുല്ലൂപ്പി പള്ളിപ്രത്ത് നടന്ന തൊഴിലുറപ്പ് പദ്ധതി പ്രകാരമുള്ള കോൺക്രീറ്റ് പ്രവൃത്തിക്കിടെ കഴിഞ്ഞ ദിവസം ഇതര സംസ്ഥാന തൊഴിലാളി സ്ത്രീ മരിച്ച സംഭവത്തിൽ അധികൃതരുടെ ഭാഗത്ത് നിന്ന് കനത്ത വീഴ്ചയുണ്ടായെന്നും അവധി ദിവസം തന്നെ പ്രവൃത്തിക്ക് തെരഞ്ഞെടുത്തതും സൈറ്റിൽ ഓവർസിയറുടെയും എഞ്ചീനിയറുടെയും സാന്നിധ്യമില്ലാത്തതും തൊഴിലുറപ്പ് പദ്ധതിയുടെ ചട്ടങ്ങൾ കാറ്റിൽ പറത്തി നിയമ വിരുദ്ധമായി പ്രവർത്തി കരാറുകാരനെ ഏൽപ്പിച്ചതും പദ്ധതിയുടെ ആട്ടിമറിയാണെന്നും, മരണപ്പെട്ട സ്ത്രീ തൊഴിലുറപ്പ് അംഗത്വം ഇല്ലാത്ത അതിഥി തൊഴിലാളിയാണെന്നതും മസ്റ്റർ റോൾ ഉൾപ്പെടെ തയ്യാറാക്കാതെ സൈറ്റിന്റെയും തൊഴിലാളികളുടെയും ഫോട്ടോ അപ്‌ലോഡ് ചെയ്യാതെ കാണിച്ച തിടുക്കവും സംശയസ്പദമാണെന്നും, സമഗ്രമായ അന്വേഷണം വേണമെന്ന് ആവശ്യപ്പെട്ടു കൊണ്ടുമാണ് ഉപരോധം സംഘടിപ്പിക്കുന്നത്.