🏍️ ഹെൽമറ്റില്ലാത്ത യാത്ര ക്യാമറയിൽ പെടാതിരിക്കാൻ ‘അതിസാഹസികത’; തല തവിടുപൊടിയാകാൻ സെക്കന്റുകൾ മതി! മുന്നറിയിപ്പുമായി എം.വി.ഡി

കണ്ണൂർ: ഹെൽമറ്റ് ധരിക്കാത്തത് പോലീസോ ക്യാമറയോ പിടിക്കാതിരിക്കാൻ ചിലർ കാണിക്കുന്ന ‘അതിബുദ്ധി’ മരണത്തിലേക്കുള്ള എളുപ്പവഴിയാണെന്ന മുന്നറിയിപ്പുമായി മോട്ടോർ വാഹന വകുപ്പ്. ക്യാമറയിൽ നിന്ന് രക്ഷപ്പെടാൻ ബൈക്കിൽ സഞ്ചരിക്കുന്ന രണ്ട് പേർ നടത്തുന്ന സാഹസികതയുടെ വീഡിയോ പങ്കുവെച്ചുകൊണ്ടാണ് എം.വി.ഡി.യുടെ ഈ ബോധവൽക്കരണം.

“കടുകുമണി വ്യത്യാസത്തിൽ ഒന്നങ്ങോട്ടോ ഇങ്ങോട്ടോ മാറിയാൽ തല തവിടുപൊടി! ഇത്ര ബുദ്ധിമുട്ടുണ്ടോ ഒരു ഹെൽമറ്റ് വയ്ക്കാൻ?” എന്നാണ് അധികൃതർ ചോദിക്കുന്നത്. സ്വന്തം സുരക്ഷയ്ക്ക് വേണ്ടിയാണ് ഹെൽമറ്റ് നിർബന്ധമാക്കിയിട്ടുള്ളത് എന്ന് തിരിച്ചറിയാതെ, പോലീസിനും എം.വി.ഡിക്കും എന്തോ കിട്ടാൻ വേണ്ടിയാണ് ഈ നിയമം എന്ന് കരുതുന്നവരാണ് പലരും.

അപകടം കാത്തിരിക്കുന്നു:

ക്യാമറ കാണുമ്പോൾ തല കുനിച്ചും, വശങ്ങളിലേക്ക് ചരിഞ്ഞും രക്ഷപ്പെടാൻ നോക്കുന്നതിനിടയിൽ വണ്ടി നിയന്ത്രണം വിട്ടാൽ സംഭവിക്കുന്നത് വലിയ ദുരന്തമായിരിക്കും. നിയമം ഭയന്നല്ല, മറിച്ച് സ്വന്തം ജീവന്റെ വില തിരിച്ചറിഞ്ഞു കൊണ്ട് ഹെൽമറ്റ് ധരിക്കാൻ ഓരോരുത്തരും തയ്യാറാകണമെന്നും അധികൃതർ ഓർമ്മിപ്പിച്ചു.

https://www.facebook.com/share/v/1AJyND4MNG/?mibextid=wwXIfr