പയ്യാമ്പലം ബീച്ചിൽ വിദേശ വനിതയ്ക്ക് തെരുവ് നായയുടെ കടിയേറ്റു

കണ്ണൂർ: പയ്യാമ്പലം ബീച്ചിൽ വിനോദസഞ്ചാരത്തിനെത്തിയ വിദേശ വനിതയ്ക്ക് തെരുവ് നായയുടെ കടിയേറ്റു. ഇറ്റലി സ്വദേശിനി ജസീക്ക സറീന അലക്സാണ്ടർ (22) നാണ് കടിയേറ്റത്. ഇന്ന് വൈകുന്നേരം നാലരയോടെയായിരുന്നു സംഭവം.

ബീച്ചിലൂടെ നടക്കുകയായിരുന്ന ജസീക്കയെ തെരുവ് നായ ആക്രമിക്കുകയായിരുന്നു. സംഭവസ്ഥലത്തുണ്ടായിരുന്ന പിങ്ക് പോലീസ് ഉദ്യോഗസ്ഥർ ഉടൻ തന്നെ ഇടപെടുകയും യുവതിയെ കണ്ണൂർ ജില്ലാ ആശുപത്രിയിൽ എത്തിക്കുകയും ചെയ്തു. ബെംഗളൂരുവിൽ ഇൻ്റേൺഷിപ്പ് ചെയ്യുന്ന ജസീക്ക അവധി ആഘോഷിക്കാനായാണ് കണ്ണൂരിലെത്തിയത്. കണ്ണൂരിലെ പ്രധാന വിനോദസഞ്ചാര കേന്ദ്രമായ പയ്യാമ്പലത്ത് തെരുവ് നായ ശല്യം രൂക്ഷമാണെന്ന പരാതിക്കിടെയാണ് ഈ സംഭവം.