നാറാത്ത്: നാറാത്ത് പഞ്ചായത്ത് തിരഞ്ഞെടുപ്പുമായി ബന്ധപ്പെട്ട് സി.പി.എം ഉന്നയിക്കുന്ന ആരോപണങ്ങൾ മറുപടി അർഹിക്കുന്നില്ലെന്നും അവജ്ഞതയോടെ തള്ളിക്കളയുന്നുവെന്നും ബി.ജെ.പി കണ്ണാടിപ്പറമ്പ് ഏരിയ കമ്മിറ്റി പ്രസ്താവനയിൽ പറഞ്ഞു. തിരഞ്ഞെടുപ്പ് വിശകലന യോഗത്തിലാണ് സി.പി.എമ്മിനെതിരെ ബി.ജെ.പി ആഞ്ഞടിച്ചത്.
സി.പി.എം – എസ്.ഡി.പി.ഐ അവിശുദ്ധ കൂട്ട്
രണ്ടാം വാർഡിൽ ബി.ജെ.പിയെ പരാജയപ്പെടുത്താൻ സി.പി.എമ്മും എസ്.ഡി.പി.ഐയും കൈകോർത്തുവെന്ന് ബി.ജെ.പി ആരോപിച്ചു. മറ്റ് പല വാർഡുകളിലും ബി.ജെ.പി സ്ഥാനാർത്ഥികൾക്കെതിരെ ക്രോസ് വോട്ടിംഗ് നടത്തി ബി.ജെ.പിയെ തോൽപ്പിക്കാനാണ് സി.പി.എം ശ്രമിച്ചത്. ഇത്തരത്തിൽ അവിശുദ്ധ കൂട്ടുകെട്ട് ഉണ്ടാക്കിയവർ ബി.ജെ.പിയെ കുറ്റപ്പെടുത്തുന്നത് പരിഹാസ്യമാണെന്ന് യോഗം വിലയിരുത്തി.
ശക്തമായ മുന്നേറ്റവുമായി ബി.ജെ.പി
ആരോപണങ്ങൾക്കിടയിലും ബി.ജെ.പി കണ്ണാടിപ്പറമ്പ് മേഖലയിൽ ശക്തമാണെന്ന് സി.പി.എമ്മിന് സമ്മതിക്കേണ്ടി വന്നിരിക്കുകയാണ്. കൊളച്ചേരി ഡിവിഷനിൽ 7500 ഓളം വോട്ടുകൾ നേടി ബി.ജെ.പി കരുത്തുറ്റ മുന്നേറ്റമാണ് കാഴ്ചവെച്ചത്.
ബി.ജെ.പിയുടെ പൊളിറ്റിക്കൽ വോട്ടുകൾ പരിശോധിച്ചാൽ ഇക്കാര്യം വ്യക്തമാകും. സി.പി.എം കോട്ടകളിൽ വിള്ളലുണ്ടാക്കാൻ ബി.ജെ.പിക്ക് സാധിച്ചത് സി.പി.എമ്മിനെ ഭയപ്പെടുത്തുന്നുണ്ടെന്നും യോഗം നിരീക്ഷിച്ചു.
നിയമസഭാ തിരഞ്ഞെടുപ്പിലേക്ക് കരുത്തോടെ
തദ്ദേശ തിരഞ്ഞെടുപ്പിലെ മുന്നേറ്റം നിയമസഭാ തിരഞ്ഞെടുപ്പിലും തുടരാൻ ശക്തമായ പ്രവർത്തനങ്ങൾ നടത്താൻ യോഗം തീരുമാനിച്ചു. വോട്ടർമാരെ നേരിൽ കണ്ട് ബി.ജെ.പിയുടെ വികസന രാഷ്ട്രീയം ജനങ്ങളിലേക്ക് എത്തിക്കാനും പ്രവർത്തനം ഊർജിതമാക്കാനും തീരുമാനമായി.
യോഗത്തിൽ മണ്ഡലം സെക്രട്ടറി സുമേഷ് ആനയോടൻ, ഏരിയ പ്രസിഡന്റ് അമർനാഥ് പി.വി, ജനറൽ സെക്രട്ടറി അശ്വിൻ വി, വൈസ് പ്രസിഡന്റ് അതുൽ പി.സി, സെക്രട്ടറി സുധീഷ് എ എന്നിവർ സംസാരിച്ചു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.