പാനൂരിൽ വടിവാൾ അക്രമം: അഞ്ച് സിപിഎം പ്രവർത്തകർ കൂടി അറസ്റ്റിൽ

മൈസൂരിൽ നിന്നാണ് പ്രതികളെ പിടികൂടിയത്

കണ്ണൂർ: കണ്ണൂർ പാനൂരിൽ യുഡിഎഫ് ആഹ്ലാദപ്രകടനത്തിനിടെ വടിവാളുമായി അക്രമം നടത്തിയ സംഭവത്തിൽ അഞ്ച് സിപിഎം പ്രവർത്തകർ കൂടി അറസ്റ്റിൽ.

ശരത്, ശ്രീജി, അശ്വന്ത്, ശ്രെയസ്, അതുൽ എന്നിവരാണ് മൈസൂരിൽ നിന്ന് പൊലീസ് പിടികൂടിയത്.

ഇതോടെ കേസിൽ പ്രതികളായ സിപിഎം പ്രവർത്തകരുടെ എണ്ണം അമ്പതോളം ആയി. പോലീസ് വാഹനം തകർത്തത് ഉൾപ്പെടെയുള്ള ഗുരുതര കുറ്റങ്ങൾ ചുമത്തിയാണ് കേസെടുത്തിരിക്കുന്നത്.

സംഘർഷത്തിന്റെ പശ്ചാത്തലം

തദ്ദേശ തിരഞ്ഞെടുപ്പിൽ 25 വർഷങ്ങൾക്ക് ശേഷം കുന്നോത്ത് പറമ്പ് പഞ്ചായത്ത് യുഡിഎഫ് പിടിച്ചെടുത്തതിനെ തുടർന്ന് ശനിയാഴ്ച വൈകിട്ട് പാനൂർ പാറാട് ടൗണിൽ ആഹ്ലാദപ്രകടനം നടന്നിരുന്നു. ഇതിനിടെയാണ് വാഹനങ്ങളിലെത്തിയ സിപിഎം പ്രവർത്തകർ ആക്രമണം ആരംഭിച്ചത്.

വ്യാപക അക്രമം

• യുഡിഎഫ് പ്രവർത്തകർക്ക് നേരെ കല്ലേറും വടിവാൾ ആക്രമണവും

• ലീഗ് പ്രവർത്തകരുടെ വീടുകളിൽ കയറി ആക്രമണം

• ലീഗ് ഓഫീസ് അടിച്ചു തകർത്തു

• നിർത്തിയിട്ടിരുന്ന കാറുകളും ബൈക്കുകളും വെട്ടി നശിപ്പിച്ചു

• പാറാട് ടൗണിലും പരിസര പ്രദേശങ്ങളിലും മണിക്കൂറുകളോളം അഴിഞ്ഞാട്ടം

ആക്രമണത്തിനിടെ മുഖം തിരിച്ചറിയാതിരിക്കാൻ പാർട്ടി കൊടി ഉപയോഗിച്ച് മറച്ചായിരുന്നു അക്രമികൾ വീടുകളിലേക്ക് പാഞ്ഞുകയറിയത്.

പൊലീസ് നടപടി

സംഭവത്തിൽ ഇതിനകം നിരവധി പേരെ അറസ്റ്റ് ചെയ്തിട്ടുണ്ടെന്നും, കൂടുതൽ അറസ്റ്റ് ഉണ്ടാകുമെന്നുമാണ് പൊലീസ് സൂചന. പ്രദേശത്ത് സംഘർഷാവസ്ഥ തുടരുന്നതിനാൽ കനത്ത പൊലീസ് സുരക്ഷ ഏർപ്പെടുത്തിയിട്ടുണ്ട്.