കണ്ണൂർ: ബാങ്കിൽ നിക്ഷേപിക്കാനെത്തിച്ച പണത്തിൽ നിന്നും കള്ളനോട്ടുകൾ പിടികൂടി. 4000 രൂപയുടെ കള്ളനോട്ടുകൾ പിടികൂടിയ സംഭവത്തിൽ ബാങ്ക് മാനേജരുടെ പരാതിയിൽ കണ്ണൂർ ടൗൺ പൊലീസ് കേസെടുത്തു. കഴിഞ്ഞ മേയ് 29 നായിരുന്നു കേസിനാസ്പദമായ സംഭവം. കണ്ണൂർ കെ.വി.ആർ ടവറിൽ പ്രവർത്തിക്കുന്ന എച്ച്.ഡി.എഫ്.സി ബാങ്കിൽ ഏച്ചൂർ സ്വദേശിനി നിക്ഷേപിച്ച നോട്ട് കെട്ടിൽ നിന്നാണ് അഞ്ഞൂറ് രൂപയുടെ വ്യാജ ഇന്ത്യൻ കറൻസികൾ പിടികൂടിയത്. സേവിംഗ്സ് അക്കൗണ്ടിൽ നിക്ഷേപിക്കാനായി കൊണ്ടുവന്ന 4,26,000രൂപയിൽ നിന്നാണ് 500 രൂപയുടെ എട്ട് വ്യാജ കറൻസികൾ കണ്ടെടുത്തത്. കണ്ടെടുത്ത കള്ളനോട്ടുകൾ പൊലീസിന് കൈമാറി.