തിരഞ്ഞെടുപ്പ്; കണ്ണൂരിൽ പൊലീസും കേന്ദ്ര സേനയും സംയുക്തമായി റൂട്ട് മാർച്ച് നടത്തി

കണ്ണൂർ: നിയമസഭാ തിരഞ്ഞെടുപ്പിനോടനുബന്ധിച്ച് സുരക്ഷാക്രമീകരണങ്ങൾ ശക്തമാക്കുന്നതിന്റെ ഭാഗമായി കണ്ണൂർ നഗരത്തിൽ പൊലീസും കേന്ദ്ര സേനയും സംയുക്തമായി റൂട്ട് മാർച്ച് നടത്തി. കണ്ണൂർ ടൗൺ പൊലീസിന്റെയും ബി.എസ്.എഫ് (BSF) ഉൾപ്പെടെയുള്ള കേന്ദ്ര സേനാ വിഭാഗത്തിന്റെയും നേതൃത്വത്തിലായിരുന്നു മാർച്ച്.

കണ്ണൂർ സിറ്റി പൊലീസ് കമ്മിഷണർ പി. നിധിൻരാജിന്റെ പ്രത്യേക നിർദേശപ്രകാരമാണ് മാർച്ച് സംഘടിപ്പിച്ചത്. നഗരത്തിലെ പഴയ ബസ് സ്റ്റാൻഡ് പരിസരത്തുനിന്ന് ആരംഭിച്ച റൂട്ട് മാർച്ച് കാൽടെക്സ് വഴി സഞ്ചരിച്ച് താവക്കരയിൽ സമാപിച്ചു.

തിരഞ്ഞെടുപ്പ് സമാധാനപരമായി നടത്തുന്നതിനും ജനങ്ങളിൽ സുരക്ഷാബോധം ഉറപ്പുവരുത്തുന്നതിനുമാണ് സേന മാർച്ച് നടത്തിയത്. കണ്ണൂർ അസിസ്റ്റന്റ് കമ്മിഷണർ ആർ. ഹരിപ്രസാദ്, ടൗൺ ഇൻസ്പെക്ടർ എസ്.ബി. കൈലാസനാഥ്, ബി.എസ്.എഫ് ഇൻസ്പെക്‌ടർ ഗിരീഷ് ഗൊഗോയ് എന്നിവർ റൂട്ട് മാർച്ചിന് നേതൃത്വം നൽകി.