കണ്ണാടിപ്പറമ്പ്: കമ്പിൽ കുമ്മായക്കടവിൽ ജലഗതാഗതം സുഗമമാക്കാനെന്ന വ്യാജേന സർക്കാർ നടത്തുന്ന മണലൂറ്റൽ വലിയ പാരിസ്ഥിതിക ആപത്തിന് കാരണമാകുമെന്ന് മുസ്ലിം ലീഗ് കണ്ണൂർ ജില്ലാ പ്രസിഡന്റ് അഡ്വ. അബ്ദുൽ കരീം ചേലേരി. യാതൊരുവിധ പാരിസ്ഥിതിക പഠനങ്ങളും നടത്താതെയാണ് ഡ്രഡ്ജിംഗ് നടത്തുന്നതെന്നും ഇത് നീതീകരിക്കാനാവില്ലെന്നും അദ്ദേഹം ആരോപിച്ചു. മണലൂറ്റൽ നടക്കുന്ന സ്ഥലം സന്ദർശിച്ച ശേഷം സംസാരിക്കുകയായിരുന്നു അദ്ദേഹം.
ആരോപണങ്ങൾ ഇങ്ങനെ:
ദേശീയപാത നിർമ്മാണത്തിനായി ‘വിശ്വസമുദ്ര’ എന്ന കമ്പനിക്ക് മണൽ കൈമാറാനാണ് സർക്കാർ തീരുമാനം. ഇതിനായി സബ് കോൺട്രാക്ടറെ ഏൽപ്പിച്ച് ഡ്രഡ്ജിംഗ് ആരംഭിച്ചിരുന്നു. എന്നാൽ സമീപവാസികളുടെയും മുസ്ലിം ലീഗ് പാർട്ടിയുടെയും പഞ്ചായത്ത് യു.ഡി.എഫ് അംഗങ്ങളുടെയും ശക്തമായ പ്രതിഷേധത്തെ തുടർന്ന് നിലവിൽ പ്രവർത്തി നിർത്തിവെച്ചിരിക്കുകയാണ്.
പാരിസ്ഥിതിക ആഘാതം:
• പഞ്ചായത്ത് ഭരണസമിതിയുമായി ആലോചിക്കാതെയാണ് ഈ ഉത്തരവ് ഇറക്കിയത്.
• ഡ്രഡ്ജിംഗ് തുടർന്നാൽ കിണറുകളിൽ ഉപ്പുവെള്ളം കയറാനും ജലം മലിനമാകാനും സാധ്യതയുണ്ട്.
• ചെളിയടിഞ്ഞ് പ്രദേശമാകെ ദുർഗന്ധം വമിക്കാനും കരയിടിച്ചിലിനും ഇത് കാരണമാകും.
• പാമ്പുരുത്തി ദ്വീപിന്റെ സുരക്ഷയെയും ഇത് ബാധിക്കുമെന്ന് അഡ്വ. അബ്ദുൽ കരീം ചേലേരി ചൂണ്ടിക്കാട്ടി.
പ്രദേശത്തെ വീടുകൾ സന്ദർശിച്ചപ്പോൾ ചില കിണറുകളിൽ ഇതിനകം തന്നെ വെള്ളത്തിന് നിറമാറ്റവും മറ്റും സംഭവിച്ചതായി ബോധ്യപ്പെട്ടിട്ടുണ്ടെന്നും അദ്ദേഹം പറഞ്ഞു. സർക്കാർ ഈ നീക്കത്തിൽ നിന്ന് പിന്തിരിയുന്നില്ലെങ്കിൽ ശക്തമായ ജനകീയ സമരങ്ങളുമായി മുന്നോട്ട് പോകാനാണ് യു.ഡി.എഫ് തീരുമാനം.
റിപ്പോർട്ട്: കണ്ണാടിപ്പറമ്പ് ഓൺലൈൻ ന്യൂസ്
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.