കണ്ണൂർ: ഏഴരക്കോടി തട്ടിപ്പ് കേസ് — ക്രൈം ബ്രാഞ്ച് അന്വേഷണം പൂർത്തിയായി, കുറ്റപത്രം സമർപ്പിച്ചു.

കണ്ണൂർ: കണ്ണൂരിലെ പ്രശസ്തമായ കൃഷ്ണ ജ്വല്ലറിയിൽ നിന്നുള്ള ഏഴരക്കോടിയുടെ തട്ടിപ്പ് കേസിൽ അന്വേഷണം പൂർത്തിയാക്കി ക്രൈം ബ്രാഞ്ച് സാമ്പത്തിക കുറ്റാന്വേഷണ വിഭാഗം കുറ്റപത്രം സമർപ്പിച്ചു.

സ്ഥാപനത്തിലെ മുൻ ചീഫ് അക്കൗണ്ടന്റായിരുന്ന ചിറക്കലിലെ കെ. സിന്ധുവിനെയും ഭർത്താവ് ബാബുവിനെയും പ്രതികളാക്കി കുറ്റപത്രം സമർപ്പിച്ചിരിക്കുന്നു. 2023-ൽ ഡിജിപിയുടെ നിർദ്ദേശപ്രകാരം കേസ് ക്രൈം ബ്രാഞ്ച് സാമ്പത്തിക കുറ്റാന്വേഷണ വിഭാഗത്തിന് കൈമാറിയിരുന്നു.

എസ്.പി. എം.പി. വിനോദ് കുമാർ, എം. പ്രദീപ് കുമാർ എന്നിവരുടെ മേൽനോട്ടത്തിൽ ഇൻസ്‌പെക്ടർ അനീഷ് ബി.യുടെ നേതൃത്വത്തിലാണ് അന്വേഷണം നടന്നത്. അന്വേഷണ സംഘത്തിൽ എസ്.ഐ. കെ. ശ്രീജിത്ത്, എ.എസ്.ഐമാരായ ശശിപ്രസാദ്, കാർത്തിക, രൂപേഷ്, സിപിഒ ശ്രീരാജ് എന്നിവരും ഉണ്ടായിരുന്നു.

65 രേഖകളും 60 സാക്ഷികളെയും ചോദ്യം ചെയ്ത ശേഷം കുറ്റപത്രം ചൊവ്വാഴ്ച കണ്ണൂർ ജുഡീഷ്യൽ ഫസ്റ്റ് ക്ലാസ് കോടതിയിൽ സമർപ്പിച്ചു.

കൃഷ്ണ ജ്വല്ലറി മാനേജിങ് പാർട്ണർ ഡോ. സി.വി. രവീന്ദ്രനാഥിന്റെ പരാതിയുടെ അടിസ്ഥാനത്തിലായിരുന്നു കേസ് രജിസ്റ്റർ ചെയ്തത്. ചീഫ് അക്കൗണ്ടന്റായ സിന്ധു കണക്കുകളിൽ കൃത്രിമം നടത്തി ഏഴരക്കോടി രൂപ തട്ടിയെടുത്തുവെന്നാരോപിച്ചാണ് കേസ്.