എല്ലാവർക്കും സുരക്ഷിതഭവനം – കോർപ്പറേഷൻ മുൻകൈഎടുക്കണം – സുധാകരൻഎം.പി.

കണ്ണൂർ കോർപ്പറേഷൻ വാർഷിക പദ്ധതിയിൽ പെടുത്തി സ്വന്തമായി കിടപ്പാടമില്ലാതെ 90 പേർക്ക് വീട് വെക്കുന്നതിന് ധനസഹായ വിതരണത്തിന് ശേഷം നിലവിൽ വാസയോഗ്യ മല്ലാത്ത വീട് വാസയോഗ്യമാക്കുന്നതിന് 1 ലക്ഷം രൂപ വീതം നൽകുന്ന പദ്ധതിയുടെ ധനസഹായ വിതരണ ഉദ്ഘാടനം കെ. സുധാകരൻ എം.പി. നിർവഹിച്ചു. ഈ തുക വീട് റിപ്പയർ ചെയ്യുന്നതിനാണ്. സർക്കാർ ഉത്തരവ് പ്രകാരം അനുവദിക്കുന്ന ഈ തുക അപര്യാപ്തമാണ് എന്ന് എല്ലാവർക്കുമറിയാം അതിനാൽ കോർപ്പറേഷൻ മുൻകൈ എടുത്ത് വിവിധ ഏജൻസികൾ, വ്യക്തികൾ എന്നിവരെ ചേർത്ത് ധനസഹായം വർദ്ധിക്കാൻ ശ്രമിക്കണമെന്നും ആയതിന് എല്ലാവിധ സഹായവും ഉണ്ടാകുമെന്നും അദ്ദേഹം പറഞ്ഞു. കഴിഞ്ഞ വർഷം ഭവന പുനരുദ്ധാരണ പദ്ധതി ക്കായി 3 കോടിയോളം രൂപ ചിലവഴിച്ചിരുന്നു. ഈ വർഷം 400 ഗുണഭോക്താക്കൾക്ക് 1 ലക്ഷം വീതം 4 കോടി രൂപയാണ് പദ്ധതിക്കായി വകയിരുത്തിയിട്ടുള്ളത്. കോർപ്പറേഷൻ വിവിധ വികസന ക്ഷേമ പ്രവർത്തനങ്ങൾ നടത്തി വരുന്നുണ്ടെന്നും സർക്കാർ ആലോചിക്കും മുമ്പേ തന്നെ കാൻസർ രോഗ നിയന്ത്രണ പരിപാടി , ജോബ് ഫെയർ എന്നിവ സംഘടിപ്പിച്ചിട്ടുണ്ടെന്നും മേയർ പറഞ്ഞു. കോർപ്പറേഷൻ മേയർ അദ്ധ്യക്ഷത വഹിച്ച ചടങ്ങിൽ ഡെപ്യുട്ടി മേയർ പി. ഇന്ദിര, സ്ഥിരം സമിതി അദ്ധ്യക്ഷൻമാരായ പി.ഷമീമ എം.പി. രാജേഷ്, സിയാദ് തങ്ങൾ, ഷാഹിന മൊയ്തീൻ, സുരേഷ് ബാബു എളയാവൂർ , പ്ലാനിംഗ് റിസോഴ്സ് പേഴ്സൺ പി.പി.കൃഷ്ണൻ മാസ്റ്റർ, യു.പി.എ പ്രൊജക്ട് ഓഫീസർ ജിതേഷ് ഖാൻ എന്നിവർ സംസാരിച്ചു.