വാഗമൺ ▸
വാഗമണിൽ ചാർജിങ് സ്റ്റേഷനിൽ കാർ പാഞ്ഞുകയറിയുണ്ടായ അപകടത്തിൽ നാലുവയസ്സുകാരൻ മരിച്ചതിനെ തുടർന്ന് അപകടം ഉണ്ടാക്കിയ ഡ്രൈവർക്ക് പൊലീസ് കേസ് രജിസ്റ്റർ ചെയ്തു. കരുനാഗപ്പള്ളി സ്വദേശിയായ ജയകൃഷ്ണനെയാണ് പൊലീസ് കേസെടുത്തത്.
നാലുവയസ്സുള്ള അയാൻഷ്നാഥ് ആണ് അപകടത്തിൽ മരണപ്പെട്ടത്. തിരുവനന്തപുരത്തെ നേമം ശാന്തിവിള സ്വദേശിനിയായ ആര്യയുടെ മകനാണ് അയാൻ. ഗുരുതരമായി പരുക്കേറ്റ അമ്മ ആര്യ പാലായിലെ സ്വകാര്യ ആശുപത്രിയിൽ ചികിത്സയിലാണ്. കുട്ടിയുടെ മൃതദേഹം കോട്ടയം മെഡിക്കൽ കോളജ് ആശുപത്രിയിൽ പോസ്റ്റ്‌മോർട്ടത്തിനായി എത്തിച്ചിട്ടുണ്ട്.
ഇന്നലെ വൈകിട്ട് വാഗമൺ വഴിക്കടവിലെ ഒരു ഇലക്ട്രിക് കാർ ചാർജിങ് സ്റ്റേഷനിലാണ് അപകടം നടന്നത്. കാർ ചാർജ് ചെയ്യാനായി എത്തിയ ആര്യയും മകനും കാറിനു പുറത്ത് ഇരിക്കുകയായിരുന്നു. ഈ സമയത്ത് മറ്റൊരു കാർ ചാർജിങ്ങിനായി സ്റ്റേഷനിൽ കയറുന്നതിനിടയിൽ, ഡ്രൈവർ ബ്രേക്കിന് പകരം അബദ്ധത്തിൽ ആക്സിലറേറ്റർ ചവിട്ടുകയായിരുന്നു എന്നതാണ് പൊലീസിന്റെ പ്രാഥമിക നിഗമനം.
ഓട്ടോമാറ്റിക് കാറാണ് അപകടമുണ്ടാക്കിയത്. അമിതവേഗത്തിൽ കാറിന്റെ നിയന്ത്രണം നഷ്ടപ്പെട്ട ഡ്രൈവർ ഇരുന്നവർക്കു നേരെ കയറി ഇടിക്കുകയായിരുന്നു.
പാലാ പോളിടെക്നിക് കോളജിലെ അധ്യാപികയായ ആര്യ, ഭർത്താവ് ശബരിനാഥിനൊപ്പം വാഗമണിലേക്ക് എത്തിയതായിരുന്നു. യാത്രക്കിടയിലെ കുറച്ചു നിമിഷങ്ങൾ ദാരുണമായ ദുഃഖത്തിലേക്ക് കൈവെച്ചത് കുടുംബത്തെയും നാട്ടിനെയും ഞെട്ടിച്ചിരിക്കുകയാണ്.