കണ്ണൂർ: തദ്ദേശ സ്വയംഭരണ തിരഞ്ഞെടുപ്പിന്റെ രണ്ടാംഘട്ട വോട്ടെടുപ്പിനിടെ മുഖ്യമന്ത്രി പിണറായി വിജയൻ നടത്തിയ പ്രതികരണം രാഷ്ട്രീയ ചർച്ചകൾക്ക് പുതുചൂടേകുന്നു. സംസ്ഥാനത്താകെ എൽ.ഡി.എഫിന് ചരിത്രവിജയം ഉറപ്പാണെന്ന് മുഖ്യമന്ത്രി വ്യക്തമാക്കി.
യു.ഡി.എഫ് കേന്ദ്രങ്ങൾ പോലും എൽ.ഡി.എഫിനെ സ്വീകരിക്കുന്നു
പരമ്പരാഗതമായി യു.ഡി.എഫ് ശക്തി കേന്ദ്രങ്ങളായി കണക്കാക്കപ്പെടുന്ന പല പ്രദേശങ്ങളിലും ഈ തവണ എൽ.ഡി.എഫിന് മികച്ച സ്വീകരണമാണെന്ന് മുഖ്യമന്ത്രി പറഞ്ഞു. ജനങ്ങളുടെ വിശ്വാസമാറ്റം വ്യക്തമായി കാണാമെന്നും അദ്ദേഹം അഭിപ്രായപ്പെട്ടു.
ശബരിമല വിഷയം തെരഞ്ഞെടുപ്പിനെ ബാധിക്കില്ല
ശബരിമല വിഷയത്തിൽ സർക്കാർ എടുത്ത നടപടികൾ കൃത്യവും നിയമാനുസൃതവുമായിരുന്നുവെന്ന് മുഖ്യമന്ത്രി പറഞ്ഞു.
“വിശ്വാസികൾക്ക് സർക്കാരിന്റെ നിലപാടിൽ പൂർണ്ണ പിന്തുണയുണ്ട്. ഈ വിഷയം തെരഞ്ഞെടുപ്പിനെ ഒരു തരത്തിലും ബാധിക്കില്ല,” — മുഖ്യമന്ത്രി വ്യക്തമാക്കി.
ബി.ജെ.പി – യു.ഡി.എഫ് ഒരേ വണ്ടിയിൽ
ശബരിമല ഉൾപ്പെടെ പല വിഷയങ്ങളിലും ബി.ജെ.പി, യു.ഡി.എഫ് എന്നീ പാർട്ടികൾ ഒരേ വണ്ടിയിൽ സഞ്ചരിക്കുന്നവരാണെന്ന് മുഖ്യമന്ത്രി വിമർശിച്ചു.
ജമാഅത്തെ ഇസ്ലാമിയെ മുസ്ലീം ബഹുജനങ്ങൾ തള്ളിയിരിക്കുന്നു
മുസ്ലിം സമൂഹത്തിന്റെ യഥാർത്ഥ നിലപാട് എല്ലായിടത്തും വ്യക്തമാണെന്നും, ജമാഅത്തെ ഇസ്ലാമിയുടെ രാഷ്ട്രീയ നിലപാടുകൾ ജനങ്ങൾ സ്വീകരിക്കുന്നില്ലെന്നും അദ്ദേഹം ആരോപിച്ചു.
രാഹുൽ മാങ്കൂട്ടത്തിൽ കേസ് — അതിജീവിതയ്ക്കൊപ്പമാണ് സർക്കാർ
രാഹുൽ മാങ്കൂട്ടത്തെതിരായ ബലാത്സംഗക്കേസുമായി ബന്ധപ്പെട്ട് KPCC പ്രസിഡന്റിന് മറുപടി നൽകുന്ന വേഷത്തിലാണ് മുഖ്യമന്ത്രി സംസാരിച്ചത്.
“അതിജീവിതയ്ക്കൊപ്പമാണ് നാടും സർക്കാരും. ലൈംഗിക വൈകൃതക്കേസുകളിൽ പ്രതികളെ ന്യായീകരിക്കാൻ ശ്രമിച്ചാൽ ജനങ്ങൾ ഒരിക്കലും അംഗീകരിക്കില്ല,” എന്ന് അദ്ദേഹം പറഞ്ഞു.
സംഭവങ്ങളെ തുറന്നു പറയാൻ അതിജീവിതകൾക്കും സാക്ഷികൾക്കും നേരിടേണ്ടി വരുന്ന ഭീഷണികൾ വലിയതാണെന്നും, ഇപ്പോൾ പുറത്തുവന്നതിലും കടുത്ത കാര്യങ്ങൾ പിന്നീട് പുറത്തുവരാനിടയുണ്ടെന്നും മുഖ്യമന്ത്രി വ്യക്തമാക്കി.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.