കണ്ണൂർ: മട്ടന്നൂർ നഗരസഭ ഒഴികെയുള്ള 92 തദ്ദേശ സ്വയംഭരണ സ്ഥാപനങ്ങളിലേക്കുള്ള വോട്ടെടുപ്പ് കണ്ണൂർ ജില്ലയിൽ ആരംഭിച്ചു. ഇന്ന് (ഡിസംബർ 11) രാവിലെ 7 മണിക്ക് ആരംഭിച്ച പോളിംഗ് വൈകുന്നേരം 6 മണിവരെ തുടരും. 20 ലക്ഷത്തിലധികം വോട്ടർമാരാണ് 1812 വാർഡുകളിലെ തങ്ങളുടെ ജനപ്രതിനിധികളെ തിരഞ്ഞെടുക്കാൻ പോളിംഗ് ബൂത്തുകളിലേക്ക് എത്തുന്നത്.
ജില്ലാ പഞ്ചായത്ത് ഉൾപ്പെടെയുള്ള ത്രിതല പഞ്ചായത്തുകളിലേക്കും കോർപ്പറേഷനിലേക്കും നഗരസഭകളിലേക്കുമായി 5472 സ്ഥാനാർഥികളാണ് മത്സരരംഗത്തുള്ളത്.
ബൂത്തുകളിൽ കനത്ത സുരക്ഷ
വോട്ടെടുപ്പ് സമാധാനപരമായി നടത്തുന്നതിനായി ജില്ലയിലെ 2305 പോളിംഗ് ബൂത്തുകളിലും കനത്ത സുരക്ഷയാണ് ഒരുക്കിയിട്ടുള്ളത്.
• 1025 സെൻസിറ്റീവ് ബൂത്തുകളിൽ വെബ് കാസ്റ്റിംഗ് സംവിധാനം ഏർപ്പെടുത്തിയിട്ടുണ്ട്.
• ഇ.വി.എം. മെഷീനുകളും പോളിംഗ് സാമഗ്രികളും ഇന്നലെ തന്നെ വിതരണ കേന്ദ്രങ്ങളിൽ നിന്ന് ബൂത്തുകളിൽ എത്തിച്ചിരുന്നു.
വോട്ടർമാർ ശ്രദ്ധിക്കാൻ
വോട്ട് ചെയ്യാനെത്തുന്നവർ നിർബന്ധമായും തിരിച്ചറിയൽ രേഖകൾ കൈയ്യിൽ കരുതണം. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പായതിനാൽ, മൾട്ടി പോസ്റ്റ് ഇ.വി.എം ഉപയോഗിക്കുമ്പോൾ ശ്രദ്ധയോടെ വോട്ട് രേഖപ്പെടുത്തണം.
രാവിലെ തന്നെ നിരവധി വോട്ടർമാർ ക്യൂവിൽ സ്ഥാനം പിടിച്ചിട്ടുണ്ട്. ആദ്യ മണിക്കൂറുകളിൽ തന്നെ പരമാവധി പേരെ പോളിംഗ് ബൂത്തുകളിൽ എത്തിക്കാനുള്ള ശ്രമത്തിലാണ് മുന്നണികളുടെ പ്രവർത്തകർ.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.