“പൊട്ടിപ്പൊളിഞ്ഞ റോഡുകളും, വീഴാറായ ആശുപത്രികളും – വെന്റിലേറ്ററിലായ ആരോഗ്യവകുപ്പ്”; കണ്ണൂർ ജില്ലാ കലക്ടറേറ്റിലേക്ക് മുസ്ലിം ലീഗ് മാർച്ച് ജൂലൈ 10ന്

കണ്ണൂർ:

“പൊട്ടിപ്പൊളിഞ്ഞ റോഡുകൾ, പൊളിഞ്ഞു വീഴാറായ കെട്ടിടങ്ങൾ, വെന്റിലേറ്ററിലായ ആരോഗ്യരംഗം, നാഥനില്ലാത്ത കേരളം” എന്ന മുദ്രാവാക്യത്തോടെ ജൂലൈ 10-ന് (വ്യാഴാഴ്‌ച) കണ്ണൂർ കലക്ട്രേറ്റിലേക്ക് മുസ്ലിം ലീഗിന്റെ നേതൃത്വത്തിൽ മാർച്ച് നടത്തപ്പെടും. ജില്ലാ മുസ്ലിം ലീഗ് കമ്മിറ്റിയുടെ നേതൃത്വത്തിലാണ് പ്രതിഷേധ സംഗമം നടക്കുന്നത്.

ഒരു കാലത്ത് രാജ്യത്തിന് മാതൃകയായിരുന്ന കേരളത്തിന്റെ ആരോഗ്യ മേഖലം ഇടത് സർക്കാറിൻറെ കെടുകാര്യസ്ഥതയാലും അലംഭാവത്താലും ഇന്ന് തകർന്ന നിലയിലാണ്. തിരുവനന്തപുരം മെഡിക്കൽ കോളേജിൽ അത്യാവശ്യ ഉപകരണങ്ങളില്ലെന്നും കോട്ടയം മെഡിക്കൽ കോളേജിൽ കെട്ടിടം ഇടിഞ്ഞ് സ്ത്രീക്ക് ദാരുണമായ ദുരന്തം സംഭവിച്ചതുമൊക്കെയാണ് ഈ പരാജയത്തിന്റെ തെളിവെന്ന് നേതാക്കൾ ആരോപിച്ചു.

ജില്ലയുടെ ആരോഗ്യ സംവിധാനവും ഭീഷണിയിലാണ്. കണ്ണൂർ ജില്ലാ ആശുപത്രിയും തലശ്ശേരി ജനറൽ ആശുപത്രിയിലെയും ഒ.പി വിഭാഗവും ഒരിടവേളയ്ക്കും തകർന്നുവീഴാവുന്ന അവസ്ഥയിലാണ്. ഇതോടൊപ്പം, തലശ്ശേരി എസ്.ജി.എസ്.ടി ഓഫീസും, പയ്യന്നൂർ മജിസ്ട്രേറ്റ് കോടതി, തളിപ്പറമ്പ് ഫുഡ് ഇൻസ്പെക്ടറുടെ ഓഫീസ്, ഇരിട്ടി അഗ്നിശമന നിലയം തുടങ്ങി നിരവധി സർക്കാർ സ്ഥാപനങ്ങളുടെയും കെട്ടിടങ്ങൾ ശോച്യാവസ്ഥയിൽ തുടരുന്നു.

റോഡുകളുടെ അവസ്ഥയും വർണനാതീതമാണ്. പഴയങ്ങാടി കെ.എസ്.ടി.പി റോഡും, പാപ്പിനിശ്ശേരി–പുതിയതെരു ദേശീയപാതയും പൂർണ്ണമായി തകർന്നിരിക്കുകയാണ്. വളപട്ടണം പാലം, പാപ്പിനിശ്ശേരി മേൽപ്പാലം എന്നിവ സ്ഥിതിചെയ്യുന്നത് അപകടകരമായ രീതിയിലാണ്. അശാസ്ത്രീയമായ ഗതാഗത പരിഷ്കാരങ്ങൾ പുതിയ തെരുവിൽ പൊതു ജനങ്ങൾക്ക് ബുദ്ധിമുട്ടുകൾ ഉണ്ടാക്കുന്നു.

ജില്ലാ ഭരണകൂടത്തെയും ജനപ്രതിനിധികളെയും കടുത്ത ഭാഷയിൽ വിമർശിച്ച മുസ്ലിം ലീഗ് നേതാക്കൾ, ചൊവ്വ അണ്ടർപാസിന്റെ പദ്ധതി ഒഴിവാക്കിയതും പുതിയ മേൽപ്പാലം ഇനിയും ആരംഭിക്കാത്തതും ജനവിമുഖതയാണെന്ന് ആരോപിച്ചു. 12 റോഡുകൾ ഉൾപ്പെടുത്തിയ കണ്ണൂർ നഗര പാത വികസന പദ്ധതിയും സ്ഥലം കൈമാറ്റം ഇല്ലാത്തതുകൊണ്ട് നിലച്ചു കൊണ്ടിരിക്കുകയാണ്.

മാർച്ചിന് നേതൃത്വം നൽകുന്നവരുടെ അഭിമുഖ്യത്തിൽ ചേർന്ന പത്രസമ്മേളനത്തിൽ കണ്ണൂർ ജില്ലാ മുസ്ലിം ലീഗ് പ്രസിഡണ്ട് അഡ്വ. അബ്ദുൽ കരീം ചേലേരി, ജനറൽ സെക്രട്ടറി കെ ടി സഹദുള്ള, സെക്രട്ടറിമാരായ അഡ്വ. എം.പി. മുഹമ്മദലി, ബി.കെ. അഹമ്മദ് എന്നിവർ പങ്കെടുത്തു.