കണ്ണാടിപ്പറമ്പ് മാലോട്ട് തെരുവുനായ ശല്യം രൂക്ഷം; സ്‌കൂൾ കുട്ടികൾ കടിയേൽക്കാതെ രക്ഷപ്പെട്ടത് തലനാരിഴയ്ക്ക്

അനീസ് കണ്ണാടിപറമ്പ ✍️

കണ്ണാടിപ്പറമ്പ്: കണ്ണാടിപ്പറമ്പ് മാലോട്ട് പ്രദേശം തെരുവുനായ്ക്കളുടെ ഭീതിയിൽ. ഇന്ന് രാവിലെ വീടിന് മുന്നിൽ സ്കൂൾ ബസ് കാത്തുനിൽക്കുകയായിരുന്ന കുട്ടികൾക്ക് നേരെ തെരുവുനായയുടെ ആക്രമണശ്രമമുണ്ടായി. നായ ഓടിച്ചതിനെ തുടർന്ന് കുട്ടികൾ വീട്ടിലേക്ക് ഓടിക്കയറിയതും വീട്ടുകാർ ഉടൻ ഇടപെട്ടതും കാരണമാണ് കുട്ടികൾ കടിയേൽകാതെ രക്ഷപെട്ടത്.

മാലോട്ട് പ്രദേശത്താണ് നായശല്യം ഏറ്റവും രൂക്ഷമായിരിക്കുന്നത്. സ്കൂൾ കുട്ടികളെയും കാൽനടയാത്രക്കാരെയും നായ്ക്കൾ പിന്തുടരുന്നത് ഇവിടെ പതിവാണെന്ന് നാട്ടുകാർ പരാതിപ്പെടുന്നു. വീടിന് പുറത്ത് അഴിച്ചുവെക്കുന്ന ചെരിപ്പുകളും മറ്റ് വസ്തുക്കളും നായ്ക്കൾ കടിച്ചുകൊണ്ടുപോകുന്നതും നിത്യസംഭവമാണ്.

കുട്ടികൾ കടിയേൽക്കാതെ രക്ഷപ്പെട്ടെങ്കിലും ഈ പ്രദേശത്ത് പുറത്തിറങ്ങാൻ പോലും ഭയക്കുന്ന അവസ്ഥയാണെന്ന് പരിസരവാസികൾ കണ്ണാടിപ്പറമ്പ് ഓൺലൈൻ ന്യൂസിനോട് പറഞ്ഞു. തെരുവുനായ ശല്യം പരിഹരിക്കാൻ അധികൃതർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.