കമ്പിൽ മൈതാനിപ്പള്ളിയിൽ പൈതൃകം തൊട്ടറിഞ്ഞ് ‘കണ്ണി’ നിശാ ക്യാമ്പ് സമാപിച്ചു

അനീസ് കണ്ണാടിപറമ്പ് ✍️

കമ്പിൽ: സമസ്ത നൂറാം വാർഷികാഘോഷങ്ങളുടെ ഭാഗമായി ‘ആദർശ വിശുദ്ധി നൂറ്റാണ്ടുകളിലൂടെ’ എന്ന പ്രമേയത്തെ അടിസ്ഥാനമാക്കി SKSSF കമ്പിൽ ശാഖ സംഘടിപ്പിച്ച ‘കണ്ണി’ പൈതൃക നിശാ ക്യാമ്പ് ശ്രദ്ധേയമായി. “പഴമയറിയുന്ന പുതുമയാവുക” എന്ന ലക്ഷ്യത്തോടെ സംഘടിപ്പിച്ച ക്യാമ്പിൽ നൂറുകണക്കിന് പ്രവർത്തകരാണ് പങ്കെടുത്തത്.

ജനുവരി 30 വെള്ളി രാത്രി 7 മണിക്ക് കമ്പിൽ മൈതാനിപ്പള്ളി ഗ്രൗണ്ടിൽ വെച്ചാണ് ക്യാമ്പ് നടന്നത്. സമസ്തയുടെ നൂറ്റാണ്ടിന്റെ ചരിത്രവും പാരമ്പര്യവും പുതുതലമുറയ്ക്ക് പരിചയപ്പെടുത്തുന്നതിനായി ഒരുക്കിയ ക്യാമ്പ് വേറിട്ട അനുഭവമായി. പഴയകാല ആത്മീയ പാതകളെയും പൈതൃകങ്ങളെയും ഓർമ്മിപ്പിക്കുന്ന കഥകളും അനുഭവങ്ങളും മുതിർന്ന നേതാക്കൾ പങ്കുവെച്ചു.

സയ്യിദ് അലി ഹാഷിം ബാ അലവി തങ്ങൾ , സി.പി. സക്കരിയ്യ ദാരിമി ഉസ്താദ്, മഹല്ല് ഖത്തീബ് ആഷിഖ് ഫൈസി, അസീസ് ഉസ്താദ്, രക്ഷാധികാരി മൂസാക്കാ തുടങ്ങിയ പ്രമുഖർ ക്യാമ്പിൽ സന്നിഹിതരായിരുന്നു. സമസ്തയുടെ ചരിത്രത്തിലെ പ്രധാന കണ്ണികളെയും അവരുടെ പോരാട്ടങ്ങളെയും പുതിയ തലമുറയ്ക്ക് പകർന്നുനൽകുന്ന രീതിയിലാണ് ക്യാമ്പ് സംവിധാനിച്ചത്. പാരമ്പര്യത്തിന്റെ സുഗന്ധമുള്ള കഥകൾ കേട്ടും ആത്മീയമായ കൂടിച്ചേരലിലൂടെയും ഒരു രാത്രി മുഴുവൻ നീണ്ടുനിന്ന ക്യാമ്പ് പ്രവർത്തകർക്ക് ഊർജ്ജമായി.

ഔദ്യോഗികമായ ചടങ്ങുകൾക്ക് പകരം തികച്ചും വ്യത്യസ്തവും ഹൃദ്യവുമായ രീതിയിലുള്ള അവതരണമായിരുന്നു ക്യാമ്പിന്റെ പ്രത്യേകതയെന്ന് സംഘാടകർ അറിയിച്ചു. കമ്പിൽ ശാഖ ഭാരവാഹികൾ ക്യാമ്പ് നിയന്ത്രിച്ചു.