കണ്ണൂർ: മരക്കാർകണ്ടിയിൽ വരാനിരിക്കുന്ന മലിനജല ശുദ്ധീകരണ പ്ലാന്റിന്റെ ടെൻഡർ പ്രക്രിയയിൽ കോടികളുടെ കൈക്കൂലി നടന്നതായി സിപിഎം ജില്ലാ സെക്രട്ടറി കെ.കെ. രാഗേഷ് ആരോപിച്ചു. മേയർ മുസ്ലിഹ് മഠത്തിൽ കോടികൾ വാങ്ങിയെന്നാരോപിച്ച അദ്ദേഹം, കോർപ്പറേഷന്റെ ദുർഭരണത്തിലും വികസനവിരുദ്ധ നിലപാടുകളിലും പ്രതിഷേധിച്ച് എൽഡിഎഫ് കണ്ണൂർ കോർപ്പറേഷൻ കമ്മിറ്റി സംഘടിപ്പിച്ച ധർണ ഉദ്ഘാടനം ചെയ്യുകയായിരുന്നു.
പ്ലാന്റിനായുള്ള ടെൻഡർ അംഗീകരിക്കുന്നതിൽ കൗൺസിൽ യോഗത്തിൽ എൽഡിഎഫ് വിയോജിപ്പ് അറിയിച്ചതായും രാഗേഷ് പറഞ്ഞു. തുടർന്ന് ടെൻഡർ നേടിയവർ മേയറുമായി നേരിട്ട് കൂടിക്കാഴ്ച നടത്തുകയും പദ്ധതിയുമായി സഹകരിക്കണമെന്നും ആവശ്യപ്പെട്ടതായും അദ്ദേഹം ആരോപിച്ചു. മേയറിന് ലഭിച്ച കൈക്കൂലി തുക ഇവർ തന്നെയാണ് വെളിപ്പെടുത്തിയതെന്നും രാഗേഷ് പറഞ്ഞു.
“മേയറെ കൈകാര്യം ചെയ്ത പോലെ സിപിഎം ജില്ലാ സെക്രട്ടറിയെ കൈകാര്യം ചെയ്യാമെന്ന് കരുതേണ്ട. 140 കോടി രൂപയുടെ പദ്ധതിയാണിത്. രണ്ട് കമ്പനികൾ മാത്രം പങ്കെടുത്തതിനാൽ ഉദ്ദേശിച്ചവർക്ക് തന്നെ ടെൻഡർ ലഭിച്ചു. നാടിന്റെ മാലിന്യ സംസ്കരണത്തിനായി നടപ്പാക്കുന്ന പ്രധാന പദ്ധതിയിൽ വെള്ളം ചേർത്ത് മേയർ കോടികൾ പോക്കറ്റിലാക്കി,” — രാഗേഷ് ആരോപിച്ചു.
അദ്ദേഹം പറഞ്ഞു, വിഷയം വിജിലൻസ് മുൻപാകെ എത്തിയിട്ടുണ്ട്, അന്വേഷണം നടക്കും. ടെൻഡർ റദ്ദാക്കാനുള്ള ചർച്ച ചീഫ് സെക്രട്ടറിതലത്തിൽ നടക്കുകയാണ്. “റദ്ദാക്കിയാൽ ഓപ്പൺ ടെൻഡർ വിളിക്കും. ഓപ്പൺ ടെൻഡർ വിളിച്ചാൽ 50 കോടി രൂപയെങ്കിലും കുറയും,” എന്നും രാഗേഷ് കൂട്ടിച്ചേർത്തു.
സിപിഐ നേതാവ് വെള്ളോറ രാജൻ അധ്യക്ഷനായിരുന്നു. എൽഡിഎഫ് കോർപ്പറേഷൻ സെക്രട്ടറി എം. പ്രകാശൻ, കൗൺസിലർ എൻ. സുകന്യ, സി. ധീരജ്, കെ.പി. പ്രശാന്തൻ, എം. ഉണ്ണികൃഷ്ണൻ, അസ്ലം പിലാക്കൂൽ, അജയൻ പായം, കെ.പി. സുധാകരൻ തുടങ്ങിയവർ പ്രസംഗിച്ചു.
മേയർ മുസ്ലിഹ് മഠത്തിൽ മറുപടി: “അഴിമതി ആരോപണത്തിന് പിന്നിൽ കൊള്ളയടിക്കാൻ അവസരം നിഷേധിച്ചത്”
കണ്ണൂർ: ഇടതുപക്ഷ ബന്ധമുള്ള സ്ഥാപനങ്ങൾക്ക് കൊള്ളയടിക്കാൻ അവസരമൊരുക്കാത്തതാണ് തനിക്കെതിരായ അഴിമതി ആരോപണത്തിന് പിന്നിലെന്ന് മേയർ മുസ്ലിഹ് മഠത്തിൽ പറഞ്ഞു. കണ്ണൂർ കോർപ്പറേഷൻ 10 വർഷം പൂർത്തിയാകുന്ന അവസരത്തിൽ യുഡിഎഫിന്റെ ആറുവർഷത്തെ ഭരണനേട്ടം വിശദീകരിക്കാൻ വിളിച്ച പത്രസമ്മേളനത്തിലായിരുന്നു മേയറുടെ പ്രതികരണം.
മരക്കാർകണ്ടി മലിനജല ശുദ്ധീകരണ പ്ലാന്റിനായി ഓപ്പൺ ടെൻഡറാണ് ക്ഷണിച്ചതെന്ന് മേയർ വ്യക്തമാക്കി. കരാർ ക്ഷണിച്ച തുകയിലുണ്ടായ പിഴവ് തിരുത്തിയതായും സംസ്ഥാനതല ടെക്നിക്കൽ കമ്മിറ്റിയുടെ അംഗീകാരം ലഭിച്ചാൽ മാത്രമേ പദ്ധതി മുന്നോട്ടുപോകാനാവൂ എന്നും അദ്ദേഹം പറഞ്ഞു.
“സിപിഎം അനുകൂല സ്ഥാപനത്തിന് ടെൻഡർ നൽകാത്തതാണ് ആരോപണത്തിന് പിന്നിൽ. ചേലോറയിലെ മാലിന്യനീക്ക പദ്ധതിയിലും വൻതുക ആവശ്യപ്പെട്ട കമ്പനിയെ ഒഴിവാക്കി കുറഞ്ഞ തുക ആവശ്യപ്പെട്ട സ്ഥാപനത്തിന് കരാർ നൽകി. ഇതിനെതിരെ കമ്പനി കോടതിയെ സമീപിച്ചു. നിയമനടപടിയുമായി മുന്നോട്ട് പോകും,” — മേയർ പറഞ്ഞു.
സിപിഎം നേതാവിന്റെ ബന്ധുവിന്റെ ഉടമസ്ഥതയിലുള്ള കമ്പനിക്ക് ടെൻഡർ ലഭിക്കാത്തതാണ് സിപിഎമ്മിനെ ചൊടിപ്പിച്ചതെന്നും അദ്ദേഹം ആരോപിച്ചു. “പൊതുമുതൽ കൊള്ളയടിക്കാൻ അവസരം നിഷേധിച്ചതിനാണ് അഴിമതി ആരോപണം. മന്ത്രിയും സിപിഎം ജില്ലാ സെക്രട്ടറിയും ഉദ്യോഗസ്ഥരെ പാവകളാക്കി കോർപ്പറേഷനെതിരേ ഉപയോഗിക്കുകയാണ്,” — മേയർ ആരോപിച്ചു.
പടന്നപ്പാലത്ത് മലിനജലം ശുദ്ധീകരിച്ച് മാത്രമേ തോട്ടിലേക്ക് ഒഴുക്കുകയുള്ളൂവെന്നും, അനാവശ്യ വിവാദം സൃഷ്ടിച്ച് ജനങ്ങളെ തെറ്റിദ്ധരിപ്പിക്കുകയാണെന്നും മേയർ കൂട്ടിച്ചേർത്തു.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.