🕊️ “ഡോക്ടറേ, ഈ കിളിക്കുഞ്ഞിനെ ജീവൻ വെപ്പിക്കാവോ…” — ഹൃദയം കീഴടക്കി നാലാം ക്ലാസുകാരൻ ജനിത്ത്; മന്ത്രി അഭിനന്ദനവുമായി

ഉളിക്കൽ: “ഡോക്ടറേ, ഈ കിളിക്കുഞ്ഞിനെ ജീവൻ വെപ്പിക്കാവോ…” — ഈ വാക്കുകൾ കേട്ട് ഒരു നിമിഷം ആ ഡോക്ടറുടെ ഹൃദയം മാത്രമല്ല, ഈ വാർത്ത അറിഞ്ഞ ഓരോ മലയാളിയുടേയും മനസ്സും സ്നേഹത്തിൽ നനഞ്ഞു.

കണ്ണൂർ ഇരിക്കൂർ ഉപജില്ലയിലെ പരിക്കൽ ശാരദാവിലാസം എ.യു.പി. സ്കൂളിലെ നാലാം ക്ലാസുകാരനായ ജനിത്ത്, വഴിയരികിൽ പരിക്കേറ്റ് കിടന്ന ഒരു കിളിക്കുഞ്ഞുമായി സമീപത്തെ ഹോമിയോ ആശുപത്രിയിലേക്ക് ഓടിയെത്തുകയായിരുന്നു.

ഡോ. ജെ. സ്റ്റീന പക്ഷിക്കുഞ്ഞിനെ രക്ഷിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല. പക്ഷേ, ജനിത്തിന്റെ കാരുണ്യവും ഉത്തരവാദിത്തബോധവും അധ്യാപകരുടെയും സമൂഹത്തിന്റെയും ഹൃദയത്തിൽ ഇടം നേടി.

ഈ മനോഹരമായ നിമിഷം ക്യാമറയിൽ പകർത്തിയ നഴ്‌സറി ടീച്ചർ രമ്യയുടെ ഫോട്ടോ പിന്നീട് വിദ്യാഭ്യാസമന്ത്രിയായ വി. ശിവൻകുട്ടിയുടെ ശ്രദ്ധയിൽപ്പെട്ടു.

മന്ത്രി തന്റെ ഫേസ്ബുക്ക് പേജിൽ കുറിച്ചു:

“ഡോക്ടറേ, ഈ കിളിക്കുഞ്ഞിനെ ജീവൻ വെപ്പിക്കാവോ… 🐥

ഈ ചോദ്യം കേട്ട് ഒരുനിമിഷം ആ ഡോക്ടറുടെ മാത്രമല്ല, ഈ വാർത്ത അറിഞ്ഞ ഓരോ മലയാളിയുടെയും ഹൃദയം സ്നേഹം കൊണ്ട് നിറഞ്ഞിട്ടുണ്ട്.

ജീവജാലങ്ങളോടുള്ള ഈ സഹാനുഭൂതിയും കരുതലും നമ്മുടെ കുട്ടികളിൽ വളരുന്നു എന്നതിൽ നമുക്കെല്ലാം അഭിമാനമുണ്ട്.

പ്രിയ ജനിത്തിന് ഹൃദയം നിറഞ്ഞ സ്നേഹാഭിനന്ദനങ്ങൾ. മോനെയോർത്ത് ഞങ്ങൾക്കെല്ലാം അഭിമാനമുണ്ട്.”

സ്കൂളിൽ നടന്ന അസംബ്ലിയിൽ ജനിത്തിനെ പ്രഥമാധ്യാപകൻ കെ.കെ. സുരേഷ്‌കുമാർ ആദരിച്ചു. ജനിത്ത് ഇപ്പോൾ പൊയ്യൂർക്കരിയിലെ അമ്മമ്മ കാർത്യായനിയോടൊപ്പം താമസിക്കുന്നു.