തിരുവനന്തപുരം: നിയമസഭാ തിരഞ്ഞെടുപ്പിന് ഇനി 11 നാൾ മാത്രം ശേഷിക്കെ സംസ്ഥാനത്ത് തിരഞ്ഞെടുപ്പ് പ്രചാരണം അവസാന ലാപ്പിലേക്ക് കടന്നു. എൻ.ഡി.എയുടെ തിരഞ്ഞെടുപ്പ് പ്രചാരണ പരിപാടികൾക്കായി പ്രധാനമന്ത്രി നരേന്ദ്ര മോദി ഇന്ന് കേരളത്തിലെത്തും. പാലക്കാടും തൃശൂരുമാണ് പ്രധാനമന്ത്രിയുടെ പ്രധാന പരിപാടികൾ. എൽ.ഡി.എഫ് പ്രചാരണത്തിനായി മുഖ്യമന്ത്രി പിണറായി വിജയൻ ഇന്ന് മലപ്പുറത്തും, പ്രതിപക്ഷ നേതാവ് വി.ഡി. സതീശൻ വടക്കൻ പറവൂരിലും പര്യടനം നടത്തും.
പ്രധാനമന്ത്രിയുടെ സന്ദർശനം; തൃശൂരിൽ റോഡ് ഷോ
കോയമ്പത്തൂരിൽ നിന്ന് ഹെലികോപ്റ്ററിലെത്തുന്ന പ്രധാനമന്ത്രി, ഉച്ചയ്ക്ക് 2.30-ന് പാലക്കാട് കോട്ടമൈതാനത്ത് നടക്കുന്ന എൻ.ഡി.എ തിരഞ്ഞെടുപ്പ് സമ്മേളനത്തിൽ പങ്കെടുക്കും. തുടർന്ന് വൈകിട്ട് 4 മണിയോടെ തൃശൂർ കുട്ടനെല്ലൂർ കോളേജ് ഗ്രൗണ്ടിലെ ഹെലിപാഡിലെത്തുന്ന അദ്ദേഹത്തെ കേന്ദ്രമന്ത്രി സുരേഷ് ഗോപിയുടെ നേതൃത്വത്തിൽ സ്വീകരിക്കും. 4.15-ന് തൃശൂർ സ്വരാജ് റൗണ്ടിൽ (ജില്ലാ ജനറൽ ആശുപത്രി മുതൽ ബിനി ഹെറിറ്റേജ് വരെ) പ്രധാനമന്ത്രിയുടെ റോഡ് ഷോ നടക്കും. പത്മജാ വേണുഗോപാൽ ഉൾപ്പെടെ ജില്ലയിലെ എൻ.ഡി.എ സ്ഥാനാർത്ഥികളും അരലക്ഷത്തിലധികം പ്രവർത്തകരും റോഡ് ഷോയിൽ അണിനിരക്കും. ഇതിന് മുന്നോടിയായി തൃശൂർ നഗരത്തിൽ ഉച്ചയ്ക്ക് 12 മണി മുതൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്. സുരക്ഷാ ക്രമീകരണങ്ങളും ട്രയൽ റണ്ണും ഇതിനോടകം പൂർത്തിയായി.
മുഖ്യമന്ത്രി മലപ്പുറത്ത്
മുഖ്യമന്ത്രി പിണറായി വിജയൻ ഇന്ന് മലപ്പുറം ജില്ലയിലെ തിരഞ്ഞെടുപ്പ് പരിപാടികളിലാണ് പങ്കെടുക്കുന്നത്. രാവിലെ 9 മണിക്ക് വാർത്താസമ്മേളനം നടത്തിയ ശേഷം തിരൂർ, പൊന്നാനി മണ്ഡലങ്ങളിലും, വൈകിട്ട് തവനൂർ, പെരിന്തൽമണ്ണ മണ്ഡലങ്ങളിലുമാണ് അദ്ദേഹം റാലികൾ ഉദ്ഘാടനം ചെയ്യുക. എൽ.ഡി.എഫും യു.ഡി.എഫും തമ്മിൽ ശക്തമായ മത്സരം നടക്കുന്ന മണ്ഡലങ്ങളിലാണ് മുഖ്യമന്ത്രിയുടെ ഇന്നത്തെ പര്യടനം. എസ്.ഡി.പി.ഐ പിന്തുണയടക്കമുള്ള വിഷയങ്ങളിൽ മുഖ്യമന്ത്രി എന്ത് പ്രതികരണം നടത്തുമെന്നത് രാഷ്ട്രീയ കേരളം ഉറ്റുനോക്കുന്നുണ്ട്.
അതേസമയം, കോൺഗ്രസ് നേതാവ് രാഹുൽ ഗാന്ധി നാളെ പത്തനംതിട്ട ജില്ലയിൽ പ്രചാരണത്തിനെത്തും. തിരഞ്ഞെടുപ്പ് അവസാന ഘട്ടത്തിലേക്ക് കടക്കുമ്പോഴും, എസ്.ഡി.പി.ഐ വോട്ട്, മുന്നണികൾ തമ്മിലുള്ള ഡീൽ ആരോപണം തുടങ്ങിയ വിഷയങ്ങൾ തന്നെയാണ് സംസ്ഥാനത്ത് പ്രചാരണ രംഗത്ത് ചൂടുപിടിപ്പിക്കുന്നത്.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.