ഒപ്പന പെരുമയുമായി ടീം ചെഗുവേര; തുടർച്ചയായ മൂന്നാം വർഷവും ജില്ലാ കിരീടം നാറാത്ത് പഞ്ചായത്തിന്

അനീസ് കണ്ണാടിപറമ്പ ✍️

കണ്ണൂർ : കണ്ണൂർ ജില്ലാ കേരളോത്സവവേദിയിൽ ഒപ്പന മത്സരത്തിൽ തുടർച്ചയായ മൂന്നാം വർഷവും ഒന്നാം സ്ഥാനവും എ ഗ്രേഡും കരസ്ഥമാക്കി നാറാത്ത് പഞ്ചായത്തിനെ പ്രതിനിധീകരിച്ചെത്തിയ പുല്ലൂപ്പി ചെഗുവേര സെന്റർ. കണ്ണാടിപ്പറമ്പിന്റെ കലാ-കായിക-സാംസ്കാരിക മണ്ഡലങ്ങളിൽ കഴിഞ്ഞ 23 വർഷമായി സജീവമായ ചെഗുവേര സെന്റർ, പ്രൊഫഷണൽ പരിശീലനങ്ങളുടെ പിൻബലമില്ലാതെ സ്വന്തം പ്രയത്നം കൊണ്ട് നേടിയ ഈ വിജയം നാടിന് അഭിമാനമായി.

സ്വയം പരിശീലനം; പണമല്ല പ്രധാനം

മറ്റു പല ക്ലബ്ബുകളും പതിനായിരങ്ങൾ മുടക്കി പ്രൊഫഷണൽ പരിശീലകരെ വെച്ച് തയ്യാറെടുപ്പുകൾ നടത്തുമ്പോൾ, ചെഗുവേര സെന്ററിലെ പെൺകുട്ടികൾ സ്വന്തമായി ചിട്ടപ്പെടുത്തിയ പരിശീലനമുറകളിലൂടെയാണ് സംസ്ഥാനതലത്തിലേക്ക് യോഗ്യത നേടിയത്. കഴിഞ്ഞ രണ്ട് വർഷവും സംസ്ഥാന കേരളോത്സവത്തിൽ മൂന്നാം സ്ഥാനം നേടിയ ഈ ടീം, ഇത്തവണ കൂടുതൽ കരുത്തോടെയാണ് സംസ്ഥാന അങ്കത്തട്ടിലിറങ്ങുന്നത്.

രാത്രികാലങ്ങളിലെ കഠിനപ്രയത്നം

പഠനത്തിനും ജോലിക്കും ശേഷം വൈകിട്ട് 7 മണി മുതൽ രാത്രി 10 മണി വരെ നീളുന്ന കഠിനമായ പരിശീലനമാണ് ഈ വിജയത്തിന് പിന്നിലെ ഊർജ്ജം. അവധി ദിവസങ്ങളിൽ സമയം മറന്ന് നടത്തിയ പരിശീലനങ്ങൾ ഒടുവിൽ ജില്ലാ കിരീടത്തിലേക്കുള്ള ഹാട്രിക് വിജയമായി മാറി. മാർഗംകളിയിൽ ഒന്നാം സ്ഥാനം നേടിയതിന് പിന്നാലെയാണ് ഒപ്പനയിലും ഈ പെൺസംഘം നാറാത്ത് പഞ്ചായത്തിന്റെ അഭിമാനം ഉയർത്തിയത്.

വിജയശില്പികൾ:

കണ്ണാടിപ്പറമ്പ് സ്വദേശികളായ സ്വാതി ചന്ദ്രൻ, ഷിയാ നിരഞ്ജന, ആവണി കൃഷ്ണ, ഷെറിൻ ബേബി, അനുഷിക, വൈശാലി, വൈഷ്ണവി ലതീഷ്, ദിയ, നിത്യ , നിഷാദ് രാഗപ്രിയ എന്നിവരടങ്ങുന്ന സംഘമാണ് ചെഗുവേര സെന്ററിനായി വേദിയിൽ വിസ്മയം തീർത്തത്. വിജയികളെ നാറാത്ത് പഞ്ചായത്ത് ഭരണസമിതിയും വിവിധ സംഘടനകളും നാട്ടുകാരും അഭിനന്ദിച്ചു.