കണ്ണൂർ: കണ്ണൂർ ജില്ലാ പഞ്ചായത്ത് പ്രസിഡന്റായി ബിനോയ് കുര്യനും വൈസ് പ്രസിഡന്റായി ടി. ഷബ്നയും മത്സരിക്കും. സി.പി.ഐ(എം) ജില്ലാ കമ്മിറ്റി അംഗങ്ങളായ ഇരുവരെയും സ്ഥാനാർത്ഥികളായി തീരുമാനിച്ച വിവരം ജില്ലാ സെക്രട്ടറി കെ.കെ. രാഗേഷ് വാർത്താസമ്മേളനത്തിൽ അറിയിച്ചു.
അനുഭവസമ്പത്തുള്ള നേതൃത്വം:
നിലവിലെ ജില്ലാ പഞ്ചായത്ത് വൈസ് പ്രസിഡന്റായി മികച്ച പ്രവർത്തനം കാഴ്ചവെച്ച വ്യക്തിയാണ് ബിനോയ് കുര്യൻ. ടി. ഷബ്നയാകട്ടെ കോട്ടയം പഞ്ചായത്ത് പ്രസിഡന്റ് എന്ന നിലയിൽ ഭരണരംഗത്ത് കഴിവ് തെളിയിച്ചിട്ടുണ്ട്. ഭരണപരവും സംഘടനാപരവുമായ ഈ അനുഭവസമ്പത്ത് ജില്ലയുടെ വികസന മുന്നേറ്റത്തിന് വലിയ കരുത്താകുമെന്ന് കെ.കെ. രാഗേഷ് പറഞ്ഞു.
തിളക്കമാർന്ന വിജയം:
ആകെ 26 ഡിവിഷനുകളുള്ള ജില്ലാ പഞ്ചായത്തിൽ 18 സീറ്റുകൾ നേടിയാണ് എൽ.ഡി.എഫ് അധികാരം നിലനിർത്തിയത്. കഴിഞ്ഞ തവണ 17 സീറ്റുകളുണ്ടായിരുന്ന സ്ഥാനത്താണ് ഇത്തവണ എൽ.ഡി.എഫ് അത് 18 ആയി ഉയർത്തിയത്. ജില്ലയുടെ സമഗ്ര വികസനത്തിന് ഊന്നൽ നൽകുന്ന പുതിയ ഭരണസമിതിയായിരിക്കും ഇതെന്നും സി.പി.ഐ(എം) നേതൃത്വം വ്യക്തമാക്കി.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.