തിരുവനന്തപുരം: കേന്ദ്ര സർക്കാർ തൊഴിൽവിരുദ്ധ നയങ്ങൾക്കെതിരെ പ്രതിപക്ഷ ട്രേഡ് യൂണിയനുകളും സർവീസ് സംഘടനകളും പ്രഖ്യാപിച്ച 24 മണിക്കൂർ ദേശീയ പണിമുടക്ക് ഇന്ന് അർധരാത്രി മുതൽ ആരംഭിക്കും.
ബി.എം.എസ് ഒഴികെയുള്ള എല്ലാ പ്രധാന ട്രേഡ് യൂണിയനുകളും പണിമുടക്കിന്റെ ഭാഗമായി പ്രവർത്തിക്കുകയാണ്. സിഐടിയു, ഐ.എൻ.ടി.യു.സി, എ.ഐ.ടി.യു.സി, എച്ച്.എം.എസ് ഉൾപ്പെടെയുള്ള 10 ദേശീയ ട്രേഡ് യൂണിയനുകളുടെ നേതൃത്വത്തിൽ ആണ് സമരം സംഘടിപ്പിച്ചിരിക്കുന്നത്.
📝 ആവശ്യങ്ങൾ:
• നാലു തൊഴിലാളി ലേബർ കോഡുകൾ പിൻവലിക്കുക
• 26000 രൂപ മിനിമം പ്രതിമാസ വേതനം എല്ലാ തൊഴിലാളികൾക്കും ഉറപ്പാക്കുക
• പൊതുമേഖലാ സംരംഭങ്ങളുടെ സ്വകാര്യവൽക്കരണം അവസാനിപ്പിക്കുക
തുടങ്ങിയ 17 ഇന ആവശ്യങ്ങളോടെയാണ് സമരം.
പണിമുടക്കിൽ ട്രേഡ് യൂണിയനുകൾക്കൊപ്പം വിവിധ സർവീസ് സംഘടനകളും, ജീവനക്കാരുടെ ഫെഡറേഷനുകളും പങ്കാളികളാവുന്നതിനാൽ, കേരളത്തിൽ ബുധനാഴ്ച ജനജീവിതം ഗൗരവമായി ബാധിക്കപ്പെടുമെന്ന് റിപ്പോർട്ടുകൾ സൂചിപ്പിക്കുന്നു.
സംയുക്ത സമരസമിതിയുടെ അഭ്യർത്ഥന:
കടകൾ അടയ്ക്കുകയും, യാത്ര ഒഴിവാക്കുകയും, പണിമുടക്കിൽ സഹകരിക്കുകയും ചെയ്യണം.
📌 ഗതാഗതം സ്തംഭിക്കുന്നു:
• കെ.എസ്.ആർ.ടി.സി ബസുകൾ, പ്രൈവറ്റ് ബസുകൾ ഓടില്ല
• ടാക്സികളും സർവീസിൽ നിന്നും ഒഴിവാകും
• മലബാർ മേഖലയിൽ ബസ് സമരം രൂക്ഷമായി ബാധിക്കും
• കൊച്ചി, കോഴിക്കോട്, മലയോരമേഖലകൾ എന്നിവിടങ്ങളിലും പ്രഭാവം ഉയർന്നിരിക്കും
ബാങ്ക്, ഇൻഷുറൻസ് തുടങ്ങിയ പൊതുമേഖലാ സ്ഥാപനങ്ങൾക്കും പണിമുടക്കിന്റെ തീവ്രമായ ബാധയുണ്ടായേക്കും. അവധി പ്രഖ്യാപിച്ചിട്ടില്ലെങ്കിലും ഗതാഗത സൗകര്യങ്ങളില്ലാത്തതിനാൽ സ്‌കൂളുകളും കോളേജുകളും പ്രവർത്തിക്കാൻ ബുദ്ധിമുട്ടുകളുണ്ടാകുമെന്ന് അധികൃതർ വ്യക്തമാക്കി.
അതേസമയം സമരത്തെ പരോക്ഷമായി വെല്ലുവിളിച്ച് സംസ്ഥാന സർക്കാരിലെ ഒരു മന്ത്രി തന്നെ രംഗത്തെത്തിയത് സംഘാടകർക്ക് അപ്രതീക്ഷിത തിരിച്ചടിയായി. കെഎസ്ആർടിസി നാളെ സർവീസ് നടത്തുമെന്ന് പറഞ്ഞ മന്ത്രി ഗണേഷ് കുമാർ ജീവനക്കാർ എല്ലാവരും സംതൃപ്തർ എന്നുകൂടി പറഞ്ഞിട്ടുണ്ട്. സമരം പ്രഖ്യാപിച്ച യൂണിയനുകൾ ഒന്നും കെഎസ്ആർടിസിക്ക് കത്ത് നൽകിയിട്ടില്ലെന്നും മന്ത്രി പറഞ്ഞു. എന്നാൽ,പണിമുടക്ക് സംബന്ധിച്ച് നേരത്തെ തന്നെ കത്ത് നൽകിയതായി വ്യക്തമാക്കി കെഎസ്ആർടിസിലെ ട്രേഡ് യൂണിയനുകൾ രംഗത്തെത്തി. മന്ത്രിയുടെ പ്രസ്താവനയെ തള്ളി ഇടതുമുന്നണി കൺവീനർ ടി പി രാമകൃഷ്ണനും രംഗത്തെത്തി. കെഎസ്ആർടിസി ജീവനക്കാർ നാളെ പണിമുടക്കുമെന്ന് വ്യക്തമാക്കിയ ടിപി രാമകൃഷ്ണൻ മന്ത്രിയുടെ പ്രസ്താവന സമരത്തെ ബാധിക്കുമെന്ന് കൂടി പറഞ്ഞു.
ഗണേഷ് കുമാറിന്റെ പ്രസ്താവന തള്ളി എംഎ ബേബി
സംയുക്ത തൊഴിലാളി സംഘടനയുടെ നേതൃത്ത്വത്തിൽ നാളെ നടക്കാനിരിക്കുന്ന ദേശീയ പണിമുടക്കിൽ കെഎസ്ആർടിസി ജീവനക്കാർ പങ്കെടുക്കില്ലെന്ന ഗതാഗത മന്ത്രി കെ ബി ഗണേഷ് കുമാറിന്റെ പ്രസ്താവന തള്ളി സിപിഎം ജനറൽ സെക്രട്ടറി എംഎ ബേബി. എല്ലാ തൊഴിലാളികളും പണിമുടക്കിൽ പങ്കെടുക്കണമെന്നാണ് താൽപര്യമെന്നും ബേബി ദില്ലിയിൽ പറഞ്ഞു. അതേസമയം പണിമുടക്കിൽ കോൺഗ്രസ് അടക്കമുള്ള മുഖ്യ പ്രതിപക്ഷ പാർട്ടികൾ നിലപാട് വ്യക്തമാക്കാത്തതിൽ തൊഴിലാളി സംഘടനകൾ കടുത്ത അതൃപ്തിയിലാണ്. ഇതേ കുറിച്ചുള്ള ചോദ്യത്തോട് അന്നം തരുന്ന കർഷകർക്കും തൊഴിലാളികൾക്കും ഒപ്പം നിൽക്കണമെന്നും, മനസ്സിലാക്കാത്തവർ ഇനിയെങ്കിലും മനസ്സിലാക്കേണ്ട സമയമാണിതെന്നും എംഎ ബേബി വ്യക്തമാക്കി.