മരംമുറിക്കുന്നതിനിടെ വൈദ്യുതിതൂൺ ദേഹത്ത് വീണുമരിച്ചു

മയ്യിൽ
നണിയൂര് നമ്പ്രത്ത് മരംമുറിക്കിടെ വൈദ്യുതിതൂൺ ദേഹത്ത് വീണ് ഒരാൾ മരിച്ചു. കണ്ടക്കൈ എരിഞ്ഞിക്കടവിലെ നിഷാദ് നിവാസിൽ കെ ഷീല (54)യാണ് മരിച്ചത്. ശനി പകൽ 3.15ഓടെയാണ് അപകടം. നണിയൂര് നമ്പ്രത്തെ മാര്യാക്കണ്ടി മറിയം എന്നിവരുടെ ഉടമസ്ഥതയിലുള്ള പറമ്പിൽ മരംമുറിക്കാനെത്തിയ സംഘത്തിലുള്ളതാണ് ഷീല. വൈകിട്ടോടെ വലിയമരം മുറിച്ച് മാറ്റുന്നതിനിടെ മരം സമീപത്തെ വൈദ്യുതി തൂണിൽപതിക്കുകയും വൈദ്യുതിതൂൺ കടപുഴകി ഷീലയുടെമേൽവീഴുകയായിരുന്നു. പരിക്കേറ്റ ഷീലയെ കൂടെ ജോലിചെയ്തവരും നാട്ടുകാരും ചേർന്ന് ഉടൻ ആശുപത്രിയിൽ എത്തിച്ചെങ്കിലും മരിച്ചു. പരേതരായ കുഞ്ഞിക്കണ്ണന്റെയും ലീലയുടെയും മകളാണ്. ഭർത്താവ്: പരേതനായ നാരായണൻ. മക്കൾ: നിഷാദ്, നിജില, നിമിഷ, പരേതനായ നിജേഷ്. മരുമക്കൾ: ഷിജിൽ(അഞ്ചരക്കണ്ടി), ശ്രീജിത്ത് (മൊറാഴ). സഹോദരങ്ങൾ: ജനാർദനൻ, ശ്രീജ, ഷീബ. കണ്ണൂർ ജില്ലാ ആശുപത്രിയിലുള്ള മൃതദേഹം മയ്യിൽ പൊലീസ് ഇൻക്വസ്റ്റ് നടത്തി പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുനൽകും.