കൂലിപ്പണിക്ക് കൊണ്ടുപോയി പണം കവർന്നു; ഒരാൾ അറസ്റ്റിൽ

വളപട്ടണം : കൂലിപ്പണിയുണ്ടെന്ന് പറഞ്ഞ് തൊഴിലാളിയെ കൊണ്ടുപോയി പണം കവർന്ന സംഭവത്തിൽ ഒരാൾ അറസ്റ്റിൽ. കോഴിക്കോട് പെരുമണ്ണ സ്വദേശി പ്രശാന്താണ് (34) വളപട്ടണം പോലീസിന്റെ പിടിയിലായത്.

തമിഴ്നാട്ടുകാരനായ പൊന്നന്റെ പണവും സ്വർണവുമാണ് കവർന്നത്. പുതിയതെരുവിൽ പണിയുണ്ടെന്ന് പറഞ്ഞാണ് പ്രശാന്ത് പൊന്നനെ കൂട്ടിക്കൊണ്ടുപോയത്. അവിടെ എത്തിയപ്പോൾ മണ്ണ് മാറ്റാനുള്ള ഉപകരണം വാടകയ്ക്ക് വാങ്ങാൻ പൊന്നനെ കടയിലേക്ക് അയക്കുകയായിരുന്നു.
ആ സമയം ഇദ്ദേഹത്തിന്റെ സഞ്ചിയിലുണ്ടായിരുന്ന പണവും സ്വർണവും മോഷ്ടിച്ചശേഷം കടന്നുകളയുകയായിരുന്നുവെന്ന് പൊന്നൻ വളപട്ടണം പോലീസിൽ നൽകിയ പരാതിയിൽ പറയുന്നു.

പോലീസിന് ലഭിച്ച രഹസ്യവിവരത്തെത്തുടർന്ന് വളപട്ടണം ഇൻസ്പെക്ടർ കെ.പി. ഷൈനിന്റെ നേതൃത്വത്തിൽ ആലുവയിൽനിന്നാണ് പ്രതിയെ പിടിച്ചത്.

കൂലിപ്പണിക്ക് ആളെ കൊണ്ടുപോയി തന്ത്രപൂർവം അദ്ദേഹത്തിന്റെ സാധനങ്ങൾ കവർച്ചനടത്തുകയായിരുന്നുവെന്ന് ചോദ്യംചെയ്യലിൽ പ്രശാന്ത് സമ്മതിച്ചു.

നിരവധി കേസുകളിലെ പ്രതിയാണ് പ്രശാന്ത് എന്നും പോലീസ് പറഞ്ഞു. പ്രതിയെ കോടതി റിമാൻഡ് ചെയ്തു.