സമ്പൂര്ണ്ണ ഡിജിറ്റല് സാക്ഷരത ഗ്രാമമായി മയ്യില് ഗ്രാമ പഞ്ചായത്ത്. സമ്പൂര്ണ ഡിജിറ്റല് സാക്ഷരത പ്രഖ്യാപനം ഡിസംബര് അഞ്ച് ചൊവ്വ രാവിലെ 11 മണിക്ക് മയ്യില് സാറ്റ്കോസ് ഓഡിറ്റോറിയത്തില് എം വി ഗോവിന്ദന് മാസ്റ്റർ എം എല് എ നിര്വഹിക്കും. പഞ്ചായത്ത് പ്രസിഡണ്ട് എം വി അജിത അധ്യക്ഷത വഹിക്കും. ലൈഫ് ഭവന പദ്ധതിയില് ഉള്പ്പെടുത്തി നിര്മ്മാണം പൂര്ത്തീകരിച്ച 28 ഭവനങ്ങളുടെ താക്കോല് കൈമാറല് ചടങ്ങും നടക്കും.
തളിപ്പറമ്പ് മണ്ഡലത്തിലെ സമ്പൂര്ണ്ണ ഡിജിറ്റല് മീഡിയ സാക്ഷരത യജ്ഞം ‘ഇടം’ പദ്ധതിയിലൂടെയാണ് മയ്യില് പഞ്ചായത്ത് സമ്പൂര്ണ ഡിജിറ്റല് സാക്ഷരത ഗ്രാമം എന്ന നേട്ടം കൈവരിച്ചത്. സംസ്ഥാന സര്ക്കാര്, സാക്ഷരതാ മിഷന്, കൈറ്റ് എന്നിവയുടെ ആഭിമുഖ്യത്തിലാണ് പദ്ധതി നടപ്പാക്കുന്നത്.
മയ്യില് പഞ്ചായത്തിലെ 18 വാര്ഡുകളിലായി 262 പഠന കേന്ദ്രങ്ങള് വഴി 7045 പേരാണ് പദ്ധതിയിലൂടെ ഡിജിറ്റല് സാക്ഷരത നേടിയത്. 6 മാസം കൊണ്ടാണ് പഞ്ചായത്തില് പദ്ധതി പൂര്ത്തീകരിച്ചത്.
ഏപ്രിലില് സംഘാടക സമിതി രൂപീകരിച്ചു. മെയ് മുതല് വാര്ഡുകളില് ഒന്നാം ഘട്ട പരിശീലനം നല്കി. പദ്ധതിയുടെ ആദ്യഘട്ടം വളണ്ടിയര്മാര് വീടുകളില് എത്തി ഡിജിറ്റല് ഫോം സര്വ്വേ നടത്തിയാണ് പഠിതാക്കളെ കണ്ടെത്തിയത്. പിന്നീട് ഓരോ വാര്ഡിലും റിസോഴ്സ് പേഴ്സണ്മാര് പഞ്ചായത്ത് തലത്തില് പരിശീലനം നല്കി. 142 റിസോഴ്സ് പേഴ്സണ്മാര് ഇതിന്റെ ഭാഗമായി. ദിവസം രണ്ടു മണിക്കൂര് വീതം അഞ്ച് ദിവസമാണ് ക്ലാസുകള് സംഘടിപ്പിച്ചത്. സ്മാര്ട്ട് ഫോണ്, ഇന്റര്നെറ്റ്, ഓണ്ലൈന് പണമിടപാട്, സാമൂഹ്യ മാധ്യമങ്ങള്, ഇമെയില് എന്നിവയിലാണ് പരിശീലനം നല്കിയത്.
വാർത്തകൾ തത്സമയം അറിയാൻ
നാറാത്ത്, കൊളച്ചേരി, ചിറക്കൽ, മയ്യിൽ, കുറ്റ്യാട്ടൂർ, വളപട്ടണം, കല്ല്യാശ്ശേരി, ചെറുകുന്ന്, പാപ്പിനിശ്ശേരി, കണ്ണപുരം, കുറുമാത്തൂർ, ചെങ്ങളായി, ഇരിക്കൂർ തുടങ്ങി ജില്ലയിലെ വിവിധ പഞ്ചായത്തുകളിലെയും മുനിസിപ്പാലിറ്റികളിലെയും കണ്ണൂർ കോർപറേഷനിലെയും വിശേഷങ്ങൾ തത്സമയം അറിയാൻ കണ്ണാടിപ്പറമ്പ് ഓൺലൈൻ ഫോളോ ചെയ്യൂ.